لاہور(کرائم رپورٹر)جوڈیشل مجسٹریٹ لاہور نے زمان پارک پولیس آپریشن میں پاکستان تحریک انصاف(پی ٹی آئی)کے گرفتار ہونے والے 102 ملزمان کا ایک روزہ جسمانی ریمانڈ منظور کر لیا۔
”پاکستان ٹائم “ کے مطابق ڈیوٹی جوڈیشل مجسٹریٹ غلام رسول نے پولیس کی درخواست پر سماعت کی۔جوڈیشل مجسٹریٹ نے 102 ملزمان کو ایک روز کے ریمانڈ پر پولیس کی تحویل میں دے دیا۔عدالت نے ملزمان کو کل انسداد دہشت گردی عدالت میں پیش کرنے کا حکم بھی دے دیا۔پولیس ملزمان کو سخت سیکیورٹی میں لے کر عدالت سے واپس روانہ ہو گئی۔
واضح رہے کہ سابق وزیر اعظم عمران خان کی جوڈیشل کمپلیکس اسلام آباد پیشی پر روانگی کے بعد انسداد تجاوزات کے نام پر لاہور پولیس نے بھاری آپریشن کرتے ہوئے عمران خان کی رہائش گاہ زمان پارک پر ہلہ بول دیا تھا،اس موقع پر پولیس نے رہائش گاہ پر موجود کارکنوں کو بدترین تشدد کا نشانہ بناتے ہوئے دروازے،خیمے اور رکاوٹیں توڑ دیں تھیں جبکہ اس موقع پر پی ٹی آئی کارکنوں اور رہائش گاہ کے ملازمین کو گرفتار کر لیا تھا۔دوسری طرف آپریشن کے معاملے پر پی ٹی آئی کارکنوں کی جانب سے پولیس پر حملے کا ایک اور مقدمہ درج کر لیا گیا ہے،مقدمہ پولیس کی مدعیت میں درج کیا گیا۔پولیس کے مطابق مقدمہ دہشت گردی،اقدام قتل سمیت 13دفعات کے تحت درج کیا گیا ہے۔ایف آئی آر کے متن میں کہا گیا ہے کہ پولیس ٹیم دہشت گردی عدالت سے جاری سرچ وارنٹ لے کر زمان پارک گئی،بات چیت شروع کرتے ہی 3 سو نامعلوم کارکنوں نے حملہ کر دیا،کارکنوں کو پیٹرول بم پھینکنے کی کوشش کے دوران قابو کیا۔تلاشی کے دوران زمان پارک سے رائفلیں بھی برآمد ہوئیں،کارکنوں نے سینئر قیادت کی ایماء پر پولیس پر حملہ کیا۔
