کراچی(سپورٹس رپورٹر)پاکستان کرکٹ ٹیم کے سابق کپتان شاہد خان آفریدی نے پاکستان تحریک انصاف (پی ٹی آئی) کے چیئرمین عمران خان سے متعلق ان کے نام سے منسوب بیان کی تردید کرتے ہوئے کہا ہے کہ مجھے اس گندی سیاست کا حصہ نہ بنائیں۔
”پاکستان ٹائم “ کے مطابق سوشل میڈیا پر سٹار کرکٹرشاہد آفریدی کے نام سے منسوب ایک بیان گردش کر رہا ہے جس میں دعویٰ کیا گیا ہے کہ ”لالہ“ نے عمران خان کو گرفتاری دینے کا مشورہ دیا ہے۔جیسے ہی اس میڈیا نے سوشل میڈیا پر وائرل ہونا شروع ہوا اور تحریک انصاف کے ورکرز کی جانب سے بوم بوم آفریدی پر تنقید کا سلسلہ طول پکڑنے لگا تو ”لالہ شاہد آفریدی“ خود میدان میں اترے اور وائرل بیان کی سختی سے تردیدکرتے ہوئے کہا کہ کل سے سوشل میڈیا پر جو میرے نام سے ایک بیان عمران بھائی سے متعلق چل رہا ہے، بہت ہی افسوس کی بات ہے، جو بھی یہ کر رہا ہے وہ بہت ہی گندی سیاست کرنے کی کوشش کر رہا ہے۔انہوں نے کہا کہ میں اس سیاست میں نہ پڑنا چاہتا ہوں اور نہ اس کا حصہ ہوں اور مجھ میں اتنی ہمت ہے کہ اگر مجھے کچھ کہنا ہوتا ہے تو میں خود سے کہہ سکتا ہوں۔شاہد آفریدی نے ان کا جعلی بیان پھیلانے والوں کو مخاطب کرتے ہوئے کہا کہ وہ انہیں بتائیں عمران خان سے متعلق یہ بیان انہوں نے کہاں جاری کیا ہے؟برائے مہربانی مجھے اس گندی سیاست کا حصہ نہ بنائیں، آپ لوگوں کو آپ کی سیاست مبارک
