لاہور(وقائع نگار خصوصی)پاکستان مسلم لیگ ق کے سربراہ چودھری شجاعت حسین نے کہا ہے کہ حالات بہت زیادہ پیچیدہ ہیں، سیاستدان آگ پر پانی نہ ڈالیں، ملک جلاو، گھیراو کا متحمل نہیں ہو سکتا، حکومت نیشنل ڈائیلاگ شروع کرے، ناراض قومی راہنماوں کے پاس جانے کے لیے تیار ہوں،تمام قوتیں مل بیٹھ کر پاکستان کا سوچیں۔
”پاکستان ٹائم“ کے مطابق ق لیگ کی مرکزی و صوبائی جنرل کونسل کا مشترکہ اجلاس ہوا، اجلاس کے دوران صوبائی کونسل نے حال ہی میں مسلم لیگ ق میں شمولیت اختیار کرنے والے چودھری سرور کو پنجاب کا صدر مقرر کر دیا گیا جبکہ شافع حسین کو جنرل سیکرٹری منتخب کر لیا۔صوبائی انٹرا پارٹی الیکشن کمیشن کے چیئرمین مصطفی ملک نے چودھری سرور اور چوہدری شافع حسین کے بلامقابلہ منتخب ہونے کا اعلان کیا۔اجلاس کے دوران یہ بھی فیصلہ کیا گیا کہ چوہدری سرور پارٹی کے مرکزی چیف آرگنائزر بھی ہوں گے۔اعلامیہ کے مطابق سالک حسین مرکزی سینئر نائب صدر، مصطفی ملک مرکزی سیکرٹری اطلاعات منتخب ہو گئے۔اس موقع پر چودھری شجاعت حسین نے کہا کہ 50 سال سیاسی سفر کے ہو گئے، ملک کے اتنے پیچیدہ حالات نہیں دیکھے، سیاستدان جلتی آگ پر پانی نہ ڈالیں، ملک جلاو¿، گھیراو کا متحمل نہیں ہو سکتا، حکومت نیشنل ڈائیلاگ شروع کرے، ناراض قومی راہنماوں کے پاس جانے کے لیے تیار ہوں، ہنگاموں، دھرنوں سے قوم پریشان، ڈیپریشن اور مایوسی بڑھ رہی ہے، مسائل کا حل سیاست دانوں کے پاس ہے ،تمام قوتیں مل بیٹھ کر پاکستان کا سوچیں۔دوسری طرف چودھری سرور نے کہا کہ مسلم لیگ کی طرف سے ملنے والے بھرپور اعتماد کے اظہار پر چوہدری شجاعت اور پوری جماعت کا شکرگزار ہوں، سب مل کر مسلم لیگ کو متبادل سیاسی قوت بنائیں گے، آئندہ انتخابات میں مسلم لیگ کلیدی کامیابی حاصل کرے گی، 5 سالوں میں ملک کا قرضہ اتاریں گے۔اس موقع پر طارق بشیر چیمہ نے کہا کہ ملک ترقی کر رہا،سابقہ حکومت کے غلط فیصلوں سے معیشت کو نقصان ہوا۔چودھری شافع حسین نے کہا کہ مسلم لیگ پنجاب کا جنرل سیکرٹری بننا اعزاز ہے، پارٹی کو ہر سطح پر فعال بنائیں گے۔چودھری سا لک حسین نے کہا کہ مسلم لیگ کو ہر سطح پر منظم کرنا ہم سب کی ذمہ داری ہے۔ روایتی سیاست نہیں کریں گے، ملک میں حقیقی تبدیلی کے خواں ہیں۔
