ریاض(مانیٹرنگ ڈیسک)سعودی عرب میں غیر ملکی باشندوں کے نومولود بچوں کا آن لائن اندراج اور برتھ سرٹیفکیٹ بنوانا ممکن ہوگیا ، سعودی حکومت نے بڑا قدم اٹھاتے ہوئے غیر ملکیوں کے بچوں کا اندارج کرنے کا طریقہ کار بنا لیا گیا ہے ۔
”پاکستان ٹائم “ کے مطابق سعودی عرب نے غیر ملکیوں کو بڑی سہولت دے دی ہے جس سے سعودی عرب میں مقیم غیر ملکیوں کو بڑی مشکل سے نجات مل جائے گی،اس بڑی سہولت کے تحت مملکت میں مقیم غیرملکی باشندوں کے لیے اپنے نومولود بچوں کا آن لائن انداراج اور برتھ سرٹیفکیٹ بنوانا ممکن ہوگیا ہے۔سعودی مملکت میں مقیم غیر ملکی اب اپنے بچوں کے برتھ سرٹیفکیٹ آن لائن حاصل کرسکتے ہیں۔اس کے علاوہ نومولود کا اندراج بھی ابشر ایپ کے ذریعے گھر بیٹھے ہوسکتا ہے، نئے طریقہ کار کا ایک بڑا فائدہ یہ بھی ہے کہ اگر کسی کا برتھ سرٹیفکیٹ ضائع ہوجائے اور غیر ملکی مملکت سے جا چکا ہو تب بھی اسے اپنے بچوں کے برتھ سرٹیفکیٹ تک بیرون ملک سے بھی رسائی ممکن ہوگی۔اس حوالے سے سعودی عرب کے سول افیئر ڈپارٹمنٹ نے کہا ہے کہ پہلے غیرملکیوں کے لیے ضروری تھا کہ وہ اپنے بچوں کا اندراج ادارے کے دفتر جا کر کروائیں،جس کے لیے انہیں ہسپتال سے ایک لیٹر حاصل کرنا ہوتا تھا جسے ’تبلیغ ولاد‘ (پیدائش کی رپورٹ) کہا جاتا ہے،یہ رپورٹ محکمے میں جمع ہوتی جس کے بعد نومولود کا عارضی برتھ سرٹیفکیٹ جاری کیا جاتا تھا اور ویکسین کورس مکمل ہونے پر باقاعدہ برتھ سرٹیفکیٹ جاری کیا جاتا تھا۔محکمہ احوال مدنیہ نے وزارت صحت کے تعاون سے اب اس میں کئی تبدیلیاں کی ہیں،پہلی تبدیلی یہ ہے کہ بچے کی پیدائش کی رپورٹ ہسپتال اپنی ویب سائٹ پر جاری کرے گا،اس رپورٹ کی بنیاد پر آن لائن محکمے سے رجوع کر کے برتھ سرٹیفکیٹ حاصل کیا جا سکتا ہے۔
