اسلام آباد(وقائع نگار خصوصی)پاکستان تحریک انصاف(پی ٹی آئی)کے مرکزی رہنما اور سابق سپیکر قومی اسمبلی اسد قیصر نے پی ٹی آئی کارکنوں اور رہنماوں پر ہونے والے تشدد کے خلاف انسانی حقوق کی تنظیموں اور عالمی اداروں کا دروازہ کھٹکھٹا دیا ۔
”پاکستان ٹائم“ کے مطابق سابق سپیکر قومی اسمبلی اور اسد قیصر نے پارٹی کارکنان پر تشدد پر عالمی اداروں و تنظیموں کو خطوط لکھ دیئے۔اسد قیصر نے دنیا بھر کے پارلیمانی اور انسانی حقوق کے فورمز کو خطوط ارسال کیئے گئے جن میں یورپی پارلیمنٹ،ہاوس آف کامن،سی پی اے،ہاوس آف لارڈ اور امریکی ایوان نمائندگان شامل ہیں۔اسد قیصر کی جانب سے لکھے گئے خطوط میں پارٹی چیئرمین عمران خان، پی ٹی آئی رہنماوں اور کارکنان پر تشدد کا نوٹس لینے کا مطالبہ کیا گیا ہے۔مراسلے میں پی ٹی آئی رہنما نے لکھا کہ پاکستان میں انسانی حقوق کی خلاف ورزیاں علم میں لانا چاہ رہا ہوں، تحریک انصاف ملک کی مقبول ترین سیاسی جماعت ہے،سیاسی ہارس ٹریڈنگ کے بعد فریش مینڈیٹ کا فیصلہ کیا تاہم خیبر پختونخوا اور پنجاب کی نگران حکومتیں سیاسی ورکرز کو گرفتار کر رہے ہیں،عمران خان کوسیاست سے نکالنے کے لئے جھوٹے فوجداری مقدمات درج کئے،عمران کے خلاف 127 مقدمات درج کیئے گئے،انہیں قاتلانہ حملے میں 11 گولیاں ماری گئیں جب کہ عمران خان کے گھر پر متعدد حملے کیئے اور کارکنان پر تشدد بھی کیا گیا۔سابق سپیکر قومی اسمبلی نے عالمی اداروں کو لکھے گئے اپنے خطوط میں لکھا کہ پی ٹی آئی کارکن ضل شاہ کو پنجاب پولیس نے حراست کے دوران تشدد سے قتل کیا اور اس قتل کا مقدمہ عمران خان پر درج کیا گیا،پی ڈی ایم پاکستان کی اعلیٰ عدلیہ پر جعلی آڈیو ویڈیو کے ذریعے بلیک میلنگ حملے کر چکی ہے،پاکستان متعدد عالمی انسانی حقوق کنونشن پر دستخط کرچکا ہے،پی ٹی آئی پر غیر آئینی طریقے سے پابندی عائد کرنے کی کوشش کی جارہی ہے۔اسد قیصر نے خط میں مزید کہا کہ الیکشن کمیشن نے غیر آئینی طور پر دو صوبوں میں سپریم کورٹ کے واضح احکامات کے باوجود انتخابات ملتوی کیے،وزیر اعظم کی بھتیجی مریم نواز نے سیاسی ورکرز کو تعصب اور نسل پرستانہ قرار دیا،پاکستانی عوام کی سیاسی نسل کشی،جمہوریت کی تباہی کو روکنے میں کردار ادا کریں۔
