لاہور) خصوصی رپورٹر )پاکستان تحریک انصاف(پی ٹی آئی)کے مینار پاکستان جلسے کے باعث لاہور کے گریٹر اقبال پارک کو کم و بیش 80 لاکھ روپے کا نقصان ہوا ہے۔
”پاکستان ٹائم “ کے مطابق پارکس اینڈ ہارٹیکلچرل اتھارٹی( پی ایچ اے)کی جانب سے تحریک انصاف کے مینار پاکستان میں منعقدہ جلسے سے گریٹر اقبال پارک میں ہونے والے نقصانات کے لیے سروے شروع کر دیا گیا ہے اور تقریبا ایک کروڑ 20 لاکھ روپے کے نقصان کا تخمینہ لگایا گیا ہے تاہم حتمی رپورٹ سوموار کے روز تک آ جائے گی۔جلسے کی وجہ سے گریٹر اقبال پارک کے بیشتر پارکس اور چھوٹے پودے تباہ ہو گئے جبکہ پی ایچ اے انتظامیہ کی جانب سے گیٹوں کو لگائے جانے والے تالے بھی جلسے میں آنے والے شرکا نے توڑ دیے۔گریٹر اقبال پارک کے پروجیکٹ ڈائریکٹر جاوید حامد کے مطابق پی ٹی آئی نے سابقہ جلسے سے 40 لاکھ روپے کا نقصان پہنچایا تھا جس کی رقم اب تک ادا نہیں کی گئی اور اب مزید نقصان ہوا ہے جس کی رپورٹ تیار کرکے پی ٹی آئی کی قیادت کو بھجوائیں گے۔شہریوں نے گریٹر اقبال پارک کے پودوں اور پارکس سے زیادہ مہنگائی اور معاشی صورتحال کو بڑا مسئلہ قرار دیا ہے۔
