دبئی(مانیٹرنگ ڈیسک)رمضان المبارک کا مقدس مہینہ بڑی تیزی کے ساتھ اپنے اختتام کی جانب گامزن ہے ،پوری مسلم امہ انتہائی جوش و خروش اور مذہبی عقیدت کے ساتھ اس ماہ مقدس میں پوری یکسوئی کے ساتھ عبادات اور فلاحی کاموں میں مصروف ہے ،ایسے میں متحدہ عرب امارات سے تعلق رکھنے والے ماہر فلکیات نے تصدیق کی ہے کہ عیدالفطرکا پہلادن21 اپریل کوہوگا، یہ رمضان کے مقدس مہینے کے اختتام اوراسلامی مہینے شوال کے آغاز کی علامت ہے۔
العربیہ اردو کے مطابق متحدہ عرب امارات کی فلکیات سوسائٹی کے بورڈ آف ڈائریکٹرزکے چیئرمین ابراہیم الجروان نے کہا ہے کہ رمضان المبارک کا پوراچاند جمعرات 20 اپریل 2023 کو مقامی وقت کے مطابق صبح 8 بج کر36 منٹ پر ہو گا جبکہ شوال کا چاند جمعرات 20 اپریل کو صبح 8 بج کر13 منٹ پر پیدا ہوگا اوریہ غروب آفتاب کے 22 منٹ بعد غروب ہو گا۔اگرحکومت تاریخوں کی تصدیق کرتی ہے تومتحدہ عرب امارات کے شہریوں اور رہائشیوں کوجمعہ 21 اپریل سے پیر 24 اپریل تک عید کی چار چھٹیاں ہوں گی۔دنیا بھر کے مسلمان ماہ صیام کے اختتام کے بعد یکم شوال کوعیدالفطر مذہبی جوش وجذبے سے مناتے اور بھرپور خوشیوں کا اظہار کرتے ہیں۔وہ طلوع آفتاب سے غروب آفتاب تک کے رمضان میں روزے رکھتے ہیں اور عید رمضان کے اختتام کی علامت ہے۔
