لاہور: (ویب ڈیسک) امریکی جریدے ٹائم کی جانب سے ایک سروے جاری کیا گیا ہے جس میں معروف بھارتی اداکار شاہ رخ خان کو بااثر ترین شخصیت کا اعزاز دیا گیا ہے۔
ٹائم میگزین کے اس سروے میں 1.2 ملین افراد شریک ہوئے، سروے میں قارئین کی جانب سے ان معروف شخصیات کا انتخاب کیا گیا جو ان کے نزدیک سب سے زیادہ بااثر ہیں۔ ووٹنگ کی لسٹ میں لیونل میسی، پرنس ہیری، میگن مارکل، مشیل ییہو، سرینا ولیمز، اور دیگرمعروف شخصیات شامل تھیں۔ سب سے زیادہ ووٹ (چار فیصد) شاہ رخ خان کو ملے، اس طرح انہوں نے دیگر تمام معروف شخصیات پر سبقت حاصل کر لی۔ شاہ رخ خان 100 سے زائد معروف فلموں میں کام کر چکے ہیں اور حال ہی میں ان کی ریلیز ہونے والی فلم پٹھان بلاک بسٹر ثابت ہوئی اور انڈیا کی سب سے زیادہ کمائی کرنے والی فلم بن چکی ہے۔ لوگوں نے 3 فیصد ووٹ ایران کی احتجاج کرنے والی خواتین کو دیے۔ ہیلتھ کیئر ورکرز کو دو فیصد ووٹ ملے، تیسری اور چوتھی پوزیشن پر پرنس ہیری اور میگھن رہے انہوں نے 1.9 ووٹ حاصل کئے۔ لیونل میسی 1.8 فیصد ووٹوں کے ساتھ پانچویں بااثر ترین شخصیت قرار پائے۔
