کچلاک(کرائم رپورٹر)بلوچستان کے قضبے کچلاک کے علاقے کلی اسپین میں دہشت گردوں کی فائرنگ سے کانسٹیبلز عبدالجبار اور جلات خان شہید ہوگئے جبکہ پولیس نے جوابی فائرنگ میں ایک حملہ آور ہلاک کر دیا۔
”پاکستان ٹائم“ کے مطابق کلی سپین میں نامعلوم دہشت گردوں نے ایگل سکواڈ پر فائرنگ کی جس کے نتیجے میں موٹر سائیکل پر سوار تین اہلکار زخمی ہوگئے، جوابی فائرنگ سے ایک مبینہ دہشت گرد کی زخمی ہونے کی اطلاع ہے۔پولیس نے علاقے کی ناکہ بندی کرتے ہوئے فرار ہونے والے دہشت گردوں کی تلاش شروع کر دی ہے کہ جبکہ اعلیٰ پولیس حکام ہسپتال پہنچ گئے ہیں۔دوسری طرف وزیراعلیٰ بلوچستان میر عبدالقدوس بزنجو نے کچلاک تھانہ کی حدود میں گشت پر مامور ایگل سکواڈ کے اہلکاروں پر فائرنگ کے واقعہ کی مذمت کرتے ہوئے کہا ہے کہ سیکورٹی اہلکاروں کی جوابی کارروائی دہشت گردوں کو کیفر کردار تک پہنچانے کے عزم کا اظہار ہے،دہشت گرد اپنی بزدلانہ کارروائیوں سے سیکیورٹی فورسز کے حوصلے پست نہیں کر سکتے، پوری قوم دہشت گردی کے خلاف جنگ میں سیکیورٹی فورسز کے ساتھ ہے۔وزیراعلیٰ نے دہشت گردوں کی فائرنگ سے دو اہلکاروں کے شہید اور دو کے زخمی ہونے پر دکھ اور افسوس کا اظہار کیا ہے، ساتھ ہی جوابی فائرنگ سے ایک دہشت گرد کو ہلاک اور دو کو زخمی کرنے پر سیکورٹی اہلکاروں کو خراج تحسین پیش کیا،وزیراعلیٰ نے شہید اہلکاروں کے خاندانوں سے تعزیت ہمدردی اور یکجہتی کا اظہار کرتے ہوئے دعا کی ہے کہ اللہ تعالیٰ شہدائ کے درجات بلند اور لواحقین کو صبر جمیل عطاءفرمائے۔وزیراعلیٰ بلوچستان نے زخمی اہلکاروں کی جلد صحتیابی کے لئے نیک خواہشات کا اظہارکیا ہے۔
