اسلام آباد(وقائع نگار) الیکشن کمیشن آف پاکستان کو مزید بااختیار بنانے کے لئے 10 رکنی پارلیمانی کمیٹی قائم کردی گئی۔
”پاکستان ٹائم“ کے مطابق الیکشن کمیشن کو مزید بااختیار بنانے کے لئے قائم کی گئی پارلیمانی کمیٹی چیئرمین سینیٹ صادق سنجرانی اور سپیکر قومی اسمبلی راجا پرویز اشرف کی مشاورت سے قائم کی گئی ہے جس کی تشکیل کا نوٹیفکیشن صادق سنجرانی کی منظوری کے بعد جاری کردیا گیا۔الیکشن کمیشن آف پاکستان سے متعلق کمیٹی میں علی ظفر،کامران مرتضیٰ،تاج حیدر، دلاور خان سمیت ڈاکٹر محمد افضل خان ڈھانڈلہ اور وفاقی وزیر سید نوید قمر شامل ہیں۔اس کے علاوہ کمیٹی میں محسن رانجھا، انجینئر صابر حسین قائم خانی جب کہ وزیر قانون و انصاف اور وزیر پارلیمانی امور بھی کمیٹی کا حصہ ہوں گے۔کمیٹی الیکشن کمیشن آف پاکستان کی ترامیم اور الیکشنز ایکٹ 2017 میں تجویز کردہ ترامیم کا جائزہ لے گی۔نوٹیفکیشن کے مطابق انتخابی اصلاحات سے متعلق کمیٹی کا پہلا اجلاس 14 اپریل کو ہو گا، کمیٹی دس روز میں الیکشن ایکٹ میں ترامیم تجویز کرے گی، پہلے اجلاس کے دوران ٹی او آرز کا مسودہ بھی تیار کرے گی۔ کمیٹی کو انتظامی امور کے لیے خصوصی کمیٹی کا درجہ حاصل ہوگا، ممبران کے لئے سہولیات کی فراہمی سے متعلق دیگر معاملات کمیٹی خود طے کرے گی۔واضح رہے کہ چیف الیکشن کمشنر نے 2روزقبل چیئرمین سینیٹ اور سپیکر قومی اسمبلی کو الیکشن ایکٹ میں ترامیم کے لئے خطوط لکھے تھے۔
