لاہور(شوبز رپورٹر)پاکستانی اداکار عثمان خالد بٹ کے والد اور پاکستان نیشنل کونسل آف آرٹس کے بانی ڈائریکٹر جنرل ڈاکٹر خالد سعید بٹ کی نماز جنازہ ادا کرنے کے بعد مقامی قبرستان میں تدفین کر دی گئی۔
”پاکستان ٹائم“ کے مطابق پاکستانی اداکار عثمان خالد بٹ کے والد ڈاکٹر خالد سعید بٹ کی نماز جنازہ خالد مسجد کیولری گراونڈ میں نماز جمعہ کے فوری بعد ادا کی گئی،نماز جنازہ میں اہم شوبز شخصیات کے علاوہ سینکڑوں شہریوں نے شرکت کی بعد ازاں انہیں مقامی قبرستان میں سپرد خاک کردیا گیا۔یاد رہے کہ اداکار خالد عثمان بٹ نے مائیکرو بلاگنگ ویب سائٹ پر ٹویٹ کرتے ہوئے اپنے مداحوں کو آگاہ کیا تھا کہ 13 اپریل کی رات کو میرے والد ڈاکٹر خالد سعید بٹ کا انتقال ہوگیا،ان کی خواہش کے مطابق والد کی نماز جنازہ جمعہ کی دوپہر 2 بج کر 30 منٹ پر لاہور کیولری گراونڈ ایکسٹینشن کے قریب خالد مسجد میں ادا کی جائے گی۔عثمان خالدبٹ نے فن کے شعبے میں اپنے والد کے کارناموں کے حوالے سے بتایا کہ ان کا پاکستان کے فنون و ثقافت میں ایک اہم کردار ہے ،ڈاکٹر خالدسعید بٹ پاکستان نیشنل کونسل آف آرٹس کے بانی ڈائریکٹر جنرل، لوک ورثہ کے سابق ڈائریکٹر جنرل، سابق ایم ڈی این اے ایف ڈی ای سی، نیشنل ہجرہ کونسل کے سابق ڈائریکٹر جنرل تھے،خالد سعید بٹ سٹیج ٹی وی کے اداکار،ہدایت کار اور مصنف تھے، پاکستان ٹیلی ویژن کے بہت سے لیجنڈز کے کریئر کے ابتدائی سالوں میں ان کا اہم کردار تھا،انہیں حکومِت پاکستان کی طرف سے پرائیڈ آف پرفارمنس سمیت کئی ایوارڈز سے نوازا گیا اس کے علاوہ فن کے شعبے میں انہیں فرانس کی حکومت کی طرف سے بھی ایوارڈ دیا گیا۔عثمان خالد بٹ نے مداحوں سے دعاوں کی درخواست کرتے ہوئے لکھا کہ اللہ والد کے درجات بلند کرے،یہ ایک بہت بڑا نقصان ہے۔
