لاہور (وقائع نگار)پاکستان تحریک انصاف کے سینئر نائب صدر اور سابق وزیر اطلاعات فواد چودھری نے کہا ہے کہ پنجاب کے نگران وزیر اعلی کو 22 اپریل کو 90دن پورے ہو جائیں گے، 23اپریل کو وہ کوئی چیک سائن کر سکتے ہیں نہ ایگزیکٹیو آرڈر پاس کر سکتے ہیں۔
پاکستان ٹائم کے مطابق میڈیا سے گفتگو کرتے ہوئے فواد چودھری نے کہا کہ ریفرنس ڈرافٹ کر رہے ہیں جو الیکشن کمیشن کو بھیج دیں گے،الیکشن کمیشن سے کہیں گے کہ نگران حکومت کے لیے سپریم کورٹ سے توسیع لیں یا نیا وزیرِ اعلی و کابینہ بنائیں۔فواد چودھری نے کہا کہ عمران خان کی مقبولیت کا عروج پارلیمنٹ سے استعفے اور اسمبلیاں توڑنے پر ہے،الیکشن 90 دنوں سے آگے نہیں جا سکتے،بے نظیر بھٹو کی شہادت پر اتفاق رائے سے الیکشن ملتوی ہوا، معاملہ عدالت میں نہیں گیا،عمران خان کس لیے گرفتاری دیں؟ان پر کوئی کیس ہی نہیں۔
