کراچی (وقائع نگار)کراچی چڑیا گھر کی ہتھنی نور جہاں کی حالت بدستور تشویشناک ہے۔جس پر برہمی کا اظہار کرتے ہوئے سابق صدر آصف زرداری کی صاحبزاری بختاور بھٹو زرداری نے کراچی چڑیا گھر کو بند کرنے کا مطالبہ کر دیا۔
”پاکستان ٹائم“ کے مطابق سوشل میڈیا پر ایک صارف کی جانب سے ہتھنی نور جہاں کی ویڈیو کو بختاور بھٹو زرداری نے ری ٹوئٹ کرتے ہوئے لکھا کہ کراچی چڑیا گھر کو بند کر دینا چاہیے کیونکہ اسے سنبھالنا کے ایم سی کے بس کی بات نہیں ہے۔ویڈیو میں پچھلی ٹانگوں سے معذور ہتھنی نورجہاں کو تالاب میں جانے کی کوشش کرتے دیکھا جا سکتا ہے۔خیال رہے کہ کراچی چڑیا گھر کی ہتھنی نور جہاں کی حالت بدستور تشویشناک ہے، ہتھنی گزشتہ روز سے ایک ہی جگہ لیٹی ہے اور چلنے پھرنے سے بھی قاصر ہے۔جسم پر کئی نشانات ہیں گذشتہ روز تالاب میں گری یا خود گئی واضح جواب نہ مل سکا۔اس حوالے سےایڈمنسٹریٹر کراچی کا کہناہے کہ بین الاقوامی ماہرین کا تجویز کردہ علاج ہورہا ہے۔ان کا دعویٰ ہے کہ ہتھنی رو بصحت ہے ایک سے دو دنوں میں چلنے پھرنے کے قابل ہوجائے گی۔
