کشمور(مانیٹرنگ ڈیسک)سندھ کے ضلع کشمور کے قریب گھیل پور کے کچے کے علاقے میں زیر تعمیر پولیس چوکی پر ڈاکووں کی فائرنگ سے دو پولیس اہلکار شہید اور چار زخمی ہو گئے۔کندھ کوٹ کے سینئر سپرنٹنڈنٹ آف پولیس عرفان علی سموں نے بتایا کہ علاقے میں نئی پولیس چوکیاں قائم کی جا رہی تھیں کہ ڈاکووں نے اچانک پولیس پر فائرنگ کر دی۔ ”پاکستان ٹائم“ کے مطابق سینئر سپرنٹنڈنٹ آف پولیس عرفان علی سموںنے بتایاکہ نئی پولیس چوکیاں قائم کی جا رہی تھیں کہ ڈاکووں نے اچانک پولیس پر فائرنگ کر دی اس کے نتیجے میں پولیس اہلکار صابر علی اور احد علی ڈومکی نے جام شہادت نوش کیا جبکہ بخشا پور کے اسٹیشن ہاوس آفیسر گل محمد مہر سمیت چار دیگر زخمی ہوئے۔ایس ایس پی نے مزید بتایا کہ زخمیوں کو رحیم یار خان کے ہسپتال لے جایا گیا جبکہ شہید اہلکاروں کی لاشوں کو سول ہسپتال کشمور منتقل کردیا گیا ہے۔ان کا مزید کہنا تھا کہ واقعے کے بعد پورے ضلع سے پولیس کی بھاری نفری کچے کے علاقے میں روانہ کردی گئی جہاں پولیس اور ڈاکووں کے درمیان فائرنگ کا تبادلہ جاری ہے۔اسی طرح کا ایک واقعہ 3 اپریل کو پیش آیا تھا جب ڈاکووں نے پولیس کے ایک بڑے دستے پر حملہ کیا تھا جو ڈاکووں کی جانب سے یرغمال بنائے گئے افراد کو آزاد کرانے کے لیے ضلع کندھ کوٹ کے درانی مہار ندی کے علاقے میں آپریشن کر رہی تھی۔مذکورہ واقعے میں ایک ایس ایچ او شہید اور پانچ زخمی ہو گئے تھے۔
