واشنگٹن (نمائندہ خصوصی ) امریکہ میں پاکستانی سفیر مسعود خان نے فارن ملٹری فنانسنگ اور فارن ملٹری سیلز بحال کرنے کا مطالبہ کر دیا۔
”پاکستان ٹائم“ کے مطابق واشنگٹن میں تقریب سے خطاب کرتے ہوئے مسعود خان نے کہا کہ پاکستان اور امریکہ نے فیصلہ کیا ہے کہ سکیورٹی فریم ورک کا دوبارہ آغاز کیا جائے، جس کا مقصد خطے کی سکیورٹی، انسداد دہشتگردی اور افغانستان میں استحکام کا فروغ ہے۔پاکستانی سفیر نے کہا کہ امریکہ، پاک بھارت بات چیت کی حوصلہ افزائی کرتا ہے، مسئلہ کشمیر کے حل کے لئے امریکہ کردار ادا کر سکتا ہے۔ مسعود خان نے زور دیا کہ جنوبی ایشیائی خطے میں استحکام اور توازن کیلئے بھی امریکہکردار ادا کرے۔ انہوں کا کہنا تھا کہ روس سے تیل خریدنے سے پہلے امریکہ سے مشاورت ہوئی، اس حوالے سے پاکستان اور امریکہ کے درمیان کوئی غلط فہمی نہیں ہے۔
