لاہور(وقائع نگار خصوصی)پاکستان میں جرمنی کے سفیر ایلفرڈ گرانس سابق وزیراعظم اور پاکستان تحریک انصاف (پی ٹی آئی)کے چیئرمین سے ملنے زمان پارک پہنچ گئے ، اتحادی حکومت کی جانب سے تحریک انصاف کے خلاف ہونے والی انتقامی کارروائیوں اور انسانی حقوق کی خلاف ورزیوں پر عمران خان نے شکایتوں کے انبار لگا دیئے ۔
”پاکستان ٹائم“ کے مطابق پاکستان میں جرمنی کے سفیر ایلفرڈ گرانس نے چیئرمین تحریک انصاف عمران خان سے ملاقات کی ہے۔جرمن سفیر اور عمران خان کی ملاقات زمان پارک لاہور میں ہوئی، جس میں دوطرفہ امور، باہمی دلچسپی کے معاملات اور تحریک انصاف کے سیاسی فلسفے سمیت اہم امور پر تفصیلی تبادلہ خیال کیا گیا۔جرمنی کے سفیر ایلفرڈ گرانس سے ملاقات میں عمران خان نے پاکستان میں انسانی حقوق کی خلاف ورزیوں کے ملک پر ممکنہ معاشی و سفارتی اثرات پر بھی گفتگو کی۔اس موقع پر عمران خان نے کہا کہ جمہوریت، آئین و قانون کی بالادستی کیلئے متحرک ہیں، ووٹ سے حکومت کا قیام جمہوریت کی اساس ہے، تحریک انصاف عوام ہی کو طاقت کا سرچشمہ سمجھتی ہے۔چیئرمین تحریک انصاف کا کہنا تھا کہ ماورائے دستور اقدامات سےعوام کو ووٹ کے حق سے محروم کیا جارہا ہے، 90 روز کی مدت گزرنے کے باوجود غیرقانونی نگران حکومتیں قائم ہیں۔
