اسلام آباد ( مانیٹرنگ ڈیسک) صدر کا الیکشن کی تاریخ دینے کا اختیار ختم کرنے کیلئے اہم ترمیم منظورکرلی گئی،کابینہ کی کمیٹی برائے قانون سازی نے الیکشن ایکٹ کے سیکشن 57 اور58 میں ترمیم کی منظوری دیدی،نئی ترمیم کے بعد صدر کے پاس انتخابات کی تاریخ دینے کا اختیار نہیں رہے گا۔
”پاکستان ٹائم “ کے مطابق کابینہ کمیٹی برائے قانون سازی نے صدر کا پولنگ کی تاریخ دینے کا اختیار ختم کرنے کے لیے اہم ترمیم منظور کرلی۔وفاقی وزیر قانون اعظم نذیر تارڑ کی زیرصدارت کابینہ کمیٹی برائے قانون سازی کا اجلاس ہوا۔کابینہ کمیٹی برائے قانون سازی نے الیکشن کمیشن کی صدر کا انتخابی تاریخ دینے کا اختیار ختم کرنے کی تجویز پر ترمیم کی منظوری دی۔ذرائع کا کہنا ہے کہ نئی ترمیم کے بعد صدر کے پاس تاریخ دینے کا اختیار نہیں رہے گا، منظور شدہ ترمیم کا مسودہ کابینہ کے آئندہ اجلاس میں پیش ہوگا۔
