اسلام آباد (مانیٹرنگ ڈیسک) وزیر اعظم کے نمائندہ خصوصی علامہ طاہر اشرفی نے کہا ہے کہہندوستان کی دعوت پر نہیں شنگھائی تعاون تنظیم کی دعوت پر بھارت گئے، بلاول صاحب کامیاب ہوئے، ہمارا دشمن تلملا اٹھا ہے۔ بلاول بھٹو کا دورہ کامیاب نہیں بہت کامیاب ہوا ہے، میں خوش ہوں میرے وزیر خارجہ کے جانے کے بعد ہندوستان میں ماتم ہو رہا ہے۔
”پاکستان ٹائم“ کے مطابق اسلام آباد میں پریس کانفرنس کرتے ہوئے وزیر اعظم کے نمائندہ خصوصی علامہ طاہر اشرفی نے کہا ہے کہ ہمارے ہاں سیاست قومی مفادات سے اوپر ہو جاتی ہے، خواہشات پر نہیں، ملک اور قوم کی پالیسیاں حقائق پر بنتی ہیں، بلاول بھٹو زرداری ہندوستان کی دعوت پر نہیں شنگھائی تعاون تنظیم کی دعوت پر بھارت گئے، بلاول صاحب کامیاب ہوئے، ہمارا دشمن تلملا اٹھا ہے، میں خوش ہوں میرے وزیر خارجہ کے جانے کے بعد ہندوستان میں ماتم ہو رہا ہے۔کشمیر کا مسئلہ ہم سب کا مسئلہ ہے، ہم امن کے داعی ہیں، مذاکرات کے تمام راستے مقبوضہ کشمیر سے ہو کر جاتے ہیں، بلاول کی جگہ شاہ محمود قریشی ہوتے تو ہم ان کے پیچھے بھی کھڑے ہوتے۔ انہوں نے کہا کہ ہم توقع کرتے ہیں کہ دوست ممالک بھارت میں اقلیتوں پر ہونیوالے ظلم کے خلاف آواز بلند کرتے ہوئے جی 20 کانفرنس میں شرکت نہیں کریں گے۔
