کراچی(سٹاف رپورٹر)متحدہ قومی موومنٹ پاکستان(ایم کیو ایم) نے پاکستان تحریک انصاف( پی ٹی آئی)کے چیئرمین عمران خان کو ”رانگ نمبر“ قرار دیتے ہوئے کہا ہے کہ ہم نے گرفتاریوں پر کبھی تشدد کا مظاہرہ کیا اور نہ کبھی ریاستی اداروں پر حملے کئے۔
”پاکستان ٹائم“ کے مطابق کراچی میں پریس کانفرنس کرتے ہوئے کنوینر ایم کیو ایم خالد مقبول صدیقی نے کہا کہ ہم نے گرفتاریوں پر کبھی تشدد کا مظاہرہ کیا اور نہ کبھی ریاستی اداروں پر حملے کئے،عمران خان ”رانگ نمبر“ثابت ہوگئے ہیں۔خالد مقبول صدیقی کا کہنا تھا کہ عمران خان سے کہتا ہوں ابھی تو ابتدائے عشق ہے، ابھی تو آپ نے کچھ دیکھا ہی نہیں، البتہ دعا ہے کہ اپ کے ساتھ ایسا نہ ہو۔اس موقع پر رہنما ایم کیو ایم مصطفیٰ کمال نے کہا کہ عمران خان کو وہ شخص چاہئے جو انہیں سیٹیں دلائے، انہیں کندھے پر بٹھا کر سٹال کرے اور چلائے بھی، عمران خان کو وہ چاہئے جو ان کے لیے سینیٹرز بھی خریدے۔انہوں نے کہا کہ باجوہ صاحب جب تک بجٹ پاس کروارہے تھے تو وہ جمہوری تھے، عمران رانگ نمبر ثابت ہوگئے ہیں، البتہ پی ٹی آئی والوں سے کہتے ہیں آپ کا لیڈر آپ کو بچانے نہیں آئے گا۔
