اسلام آباد(کورٹ رپورٹر)پاکستان تحریک انصاف(پی ٹی آئی)کے گرفتار رہنماوں کو بڑا ریلیف ملنے کا امکان پیدا ہو گیا ،اسلام آباد ہائیکورٹ نے تھری ایم پی او کے تحت گرفتار افراد کی تفصیلات طلب کرلیں اور ڈی ایس پی لیگل کو تفصیلات فراہم کرنے کا حکم دے دیا۔
”پاکستان ٹائم“ کے مطابق چیف جسٹس اسلام آباد ہائیکورٹ جسٹس عامرفاروق نے پی ٹی آئی رہنما اور معروف قانون دان ڈاکٹربابراعوان کی ضمانت درخواست پر سماعت کی۔چیف جسٹس عامر فاروق نے کہا کہ بابر اعوان سیاستدان بعد میں ہیں، پہلے وکیل ہیں، بابر اعوان نے کہا کہ اگر پولیس کو گرفتار کرنے کا شوق ہے تو پکڑ لیں، عمران خان کی گرفتاری کے وقت وکلا پرتشدد کا مقدمہ ابھی تک درج نہیں ہوا، زخمی وکلاءکا میڈیکل بھی نہیں ہوا۔چیف جسٹس اسلام آباد ہائیکورٹ نے کہا کہ میں یہاں بیٹھا ہو اور آپ سیاست میں ہولیکن ہم ایک ہی کمیونٹی ہیں، جس پر وکلاءنے کہا کہ یہ فیصل چوہدری اور علی بخاری کے پیچھے پڑے ہیں۔چیف جسٹس عامرفاروق نے کہا کہ فیصل چوہدری کو کوئی کچھ نہیں کہہ سکتا، ایف آئی آردرج کروانے کی ہدایت کی ہے اور یہ کلیئر ہے، فواد چوہدری کے معاملے کو بھی دیکھ لیتے ہیں۔چیف جسٹس عامرفاروق نے ڈی ایس پی لیگل سے تفصیلات طلب کرلیں۔عدالت نے تھری ایم پی او کے تحت گرفتار ہونے والوں کی تفصیلات فراہم کرنے کا حکم دیتے ہوئے سماعت میں وقفہ کردیا۔
