لاہور(وقائع نگار خصوصی)وزیر اعظم شہباز شریف نے شرپسندوں کو 72 گھنٹے میں گرفتار کرنے کا الٹی میٹم دیتے ہوئے کہا ہے کہ عمران خان اور ان کا جتھا پاکستان دشمنوں سے کم نہیں،شہداء اور غازیوں کی بے حرمتی کی گئی،اپنے وطن میں اپنوں نے دشمن بن کر حملے کئے،ذمہ داروں کو چن چن کر انجام تک پہنچائیں گے،تمام مقدمات انسداد دہشت گردی عدالتوں(اے ٹی سی)میں چلائے جائیں گے۔
”پاکستان ٹائم“ کے مطابق وزیراعظم شہباز شریف نے پریس کانفرنس کرتے ہوئے جناح ہاوس لاہور پر حملے پر گہرے دکھ کا اظہار کرتے ہوئے کہا کہ اس المناک واقعہ کے بعد قوم غمگین ہے،اس طرح کا کام کوئی پاکستانی سوچ بھی نہیں سکتا،جن لوگوں نے اس بدترین حرکت میں حصہ لیا آئین میں جو سزا ہے ہر صورت دی جائے گی،جنہوں نے منصوبہ بندی کی ڈنڈے،لاٹھیاں لوگوں کے حوالے کئے،قانون ان کو گرفت میں لے گا،قانون میں درج سزائیں ان لوگوں کو ملیں گی تاکہ مثال بن جائے،یہ دلخراش منظر ملکی تاریخی میں کسی نے نہ سوچا تھا نہ دیکھا تھا،اپنے لوگوں نے دشمن بن کر ملک کی تنصیبات پر حملہ کیا۔
شہباز شریف کا کہنا ہے کہ 9 مئی کے معاملات پر آج اسلام آباد میں میٹنگ کی تھی اور ہدایات جاری کیں،جنہوں نے منصوبہ بندی کی اور جو حملہ آور ہوئے انہیں چن چن کر پکڑا جائے،ملزمان کیخلاف انسداد دہشت گردی کے مقدمات اے ٹی سی میں چلائے جائیں،انسداد دہشتگردی کی عدالتوں کی تعداد بڑھائی جائیں،خانہ پوری منظور نہیں،ملوث لوگوں کو گرفتار کیا جائے۔وزیر اعظم کا کہنا ہے کہ پاکستان کے غازیوں اور شہیدوں کیخلاف عمران نیازی اور جتھہ حملہ آور ہوا،اپنے وطن میں اپنوں نے دشمن بن کر حملے کئے،جناح ہاوس کی حالت دیکھ کر دل خون کے آنسو رو رہا ہے،کاش ہمیں 9مئی کا دن نہ دیکھنا پڑتا۔اس سے قبل وزیر اعظم شہباز شریف نے لاہور میں جناح ہاوس،سی ایم ایچ اور سروسز ہسپتال کا دورہ کیا،اس موقع پر ان کے ہمراہ نگران وزیر اعلیٰ پنجاب محسن نقوی بھی تھے۔وزیر اعظم نے سروسز ہسپتال میں زیر علاج ڈی آئی جی علی ناصر رضوی سمیت دیگر پولیس افسران و زخمی اہلکاروں کی عیادت کی اور انتظامیہ کو زخمی افراد کے علاج معالجہ کیلئے بہترین طبی سہولیات فراہم کرنے کی ہدایت کی۔ڈی آئی جی علی ناصر رضوی پی ٹی آئی کارکنوں کے پتھراو سے زخمی ہوئے تھے۔اس موقع پر وزیر اعظم نے سرکاری املاک کو نقصان پہنچانے کی شدید مذمت کرتے ہو ئے کہا کہ پی ٹی آئی نے احتجاج کی آڑ میں دہشت گردی کی،یہ دہشت گردی اور ملک دشمنی ہے جسے کسی صورت قبول نہیں کیا جاسکتا،اسے آئینی اور جمہوری احتجاج نہیں کہا جاسکتا،بلوائیوں اور سہولت کاروں کیخلاف کارروائیوں میں کوئی رعایت نہیں برتی جائے گی،ہر حملہ آور کی شناخت کرکے قانون کے مطابق سزا دی جائے گی۔شہباز شریف نے کہا کہ جلاو گھیراو کر کے سرکاری املاک کو نقصان پہنچانے والوں کے ساتھ آہنی ہاتھوں سے نمٹا جائے گا۔ وزیر اعظم نے شہدا اور غازیوں کی یاد گاروں،حساس اداروں،عمارات اور جناح ہاوس کی بے حرمتی کی بھی شدید الفاظ میں مذمت کی۔
