اسلام آباد(سٹاف رپورٹر)وفاقی وزیراور پاکستان مسلم لیگ ن کے سیکرٹری جنرل احسن اقبال نے دعویٰ کرتے ہوئے کہا ہے کہ ریڈیو پاکستان کی عمارت جلانے کا ہدف عمران خان نے دیا تھا،وہ اپنے پسندیدہ چیف جسٹس کی چھتری کے نیچے چھپ نہیں سکیں گے۔
”پاکستان ٹائم“ کے مطابق اسلام آباد میں پریس کانفرنس کرتے ہوئے وفاقی وزیر منصوبہ بندی احسن اقبال کا کہنا تھا کہ عمران نیازی دوسروں سے رسیدیں مانگتے تھے، اپنی رسیدیں دینے کی باری آئی تو آپ رونے لگ گئے،ان کے درجنوں اکاونٹ پکڑے جا چکے ہیں،عمران خان بیرون ممالک سے چندہ اکٹھا کر کے سیاست چلاتے تھے،بیرون ممالک مقیم پاکستانیوں کو بذریعہ حوالہ ہنڈی پیسہ بھیجنے کا کہا گیا، 190 ملین پاونڈ منی لانڈرنگ کے تحت ضبط ہوا،منی لانڈرنگ کے ذریعے آنے والی رقم سپریم کورٹ کے اکاونٹ میں ٹرانسفر کی گئی، آپ نے فنانشنل ٹائمز کیخلاف برطانیہ میں مقدمہ کیوں نہیں کیا؟آپ اگر قانونی چارہ جوئی کرتے تو آپ کی چوری برطانیہ میں بھی پکڑی جاتی،اب آپ عدالتوں کے پیچھے چھپ رہے ہیں،آپ اپنے پسندیدہ چیف جسٹس کی چھتری کے نیچے چھپ نہیں سکیں گے۔
احسن اقبال کا کہنا تھا کہ عمران خان نے پاکستان کے اتحاد اور یکجہتی کو پارہ پارہ کیا ہے،عمران خان تشدد اور لاقانونیت کے پیچھے چھپ کر بچنا چاہتے ہیں،کالعدم تحریک طالبان پاکستان( ٹی ٹی پی) کے بعدپی ٹی آئی دوسری جماعت ہے جس نے سکولوں کوجلایا،پاکستان ایک غیرعلانیہ جنگ کاسامنا کر رہا ہے،عمران خان کے ذریعے معیشت اور سی پیک کو تباہ کیا گیا۔ن لیگی رہنما کا کہنا تھا کہ عمران خان نے چور اور ڈاکو کا کھیل کھیلا،کہتے ہیں میں گرفتار ہو گیا نہیں پتا پیچھے کیا ہوا،جب کہ آپ کی گرفتاری کے بعد مراد سعید نے کہا تمام کارکن اپنا ٹاسک پورا کریں،ریڈیو پاکستان کی عمارت کو جلایا گیا،یہ ٹارگٹ آپ نے دیا تھا،پی ٹی آئی وفاق اور جمہوریت کیلئے خطرہ بن سکتی ہے، معاشرے میں تقسیم اور نفرت کا وہ زہر گھولا گیا جس کی مثال نہیں ملتی،عمران خان کو گھناونا کھیل کھیلنے کی اجازت نہیں دی جائے گی۔
