اسلام آباد(کورٹ رپورٹر)سپریم کورٹ آف پاکستان کے چیف جسٹس عمر عطاء بندیال نے پاکستان تحریک انصاف(پی ٹی آئی) کے سربراہ اور سابق وزیر اعظم عمران خان کو ”گڈ ٹو سی یو“ کہنے پر اوپر ہونے والی تنقید کی وضاحت کر دی۔
”پاکستان ٹائم“ کے مطابق سپریم کورٹ کے چیف جسٹس عمر عطا بندیال نے 12 مئی کو القادر ٹرسٹ کیس میں عمران خان کی گرفتاری کے خلاف درخواست پر سماعت کرتے ہوئے چیئرمین پی ٹی آئی کو دیکھ کر کہا تھا کہ آپ کو دیکھ کر خوشی ہوئی،جس پر چیف جسٹس آف پاکستان کو حکمران اتحاد کی جانب سے شدید تنقید کا نشانہ بنایا جارہا ہے۔چیف جسٹس عمر عطا بندیال نے ایک بار پھر اپنے اس جملے کو دہرایا اور ایک سول مقدمے میں سماعت کے دوران وکیل اصغر سبزواری سے مکالمہ کرتے ہوئے چیف جسٹس نے کہا کہ اپ کو دیکھ کر خوشی ہوئی،ایک وقت کے بعد آپ میری عدالت آئے ہیں،آپ کو دیکھ کرخوشی ہوئی۔چیف جسٹس نے وضاحت دیتے ہوئے کہا کہ آپ کو دیکھ کر خوشی ہوئی میں ہر کسی کو کہتا ہوں،مجھے گڈ ٹو سی یو کہنے پر تنقید کا نشانہ بنایا گیا لیکن میں ہر ایک کو احترام دیتا ہوں، ادب واخلاق تو سب کیلئے ضروری ہے اس کے بغیر تو مزہ ہی نہیں۔
