اسلام آباد(سٹاف رپورٹر )پاکستان تحریک انصاف(پی ٹی آئی) کے رہنما فواد چوہدری کا کہنا ہے کہ ملک کو نقصان ہو رہا ہے بہتر ہے صلح کی طرف جائیں۔
”پاکستان ٹائم“ کے مطابق اسلام آباد ہائی کورٹ میں پیشی کے موقع پر میڈیا سے گفتگو کرتے ہوئے پی ٹی آئی رہنما فواد چوہدری نے کہا کہ ضمانت ہو لینے دیں بعد میں بات کرتے ہیں، فوجی تنصیبات پر حملے کی پہلے بھی مذمت کی ہے، جیل میں اگر کوئی اہم ملاقات ہوتی تو یہ حال ہوتا؟ دورانِ گرفتاری کل فیملی سے رابطہ ہوا۔آرمی اور آفیشل سیکریٹ ایکٹ کے تحت گرفتاریوں سے متعلق سوال کے جواب میں فواد چوہدری کا کہنا تھا کہ ملک بھر میں 8 سے 10 ہزار افراد گرفتار ہیں، اتنے لوگوں کے خلاف کیسے مقدمات چلائیں گے؟ملک کا نقصان ہو رہا ہے بہتر ہے معاملہ صلح کی طرف جائے،ملک میں کوئی قانون ہو تو بات کی جائے،سیاسی درجہ حرارت نیچے نہیں آرہا، پی ٹی آئی کی دیگر قیادت بھی اڈیالہ جیل میں ہے۔انہوں نے کہا کہ کیس ہی مذاق ہے، یہاں سے نکلیں گے تو کسی اور مقدمے میں گرفتار کر لیں گے، مجھے سی آئی اے بلڈنگ میں چھوٹے سے سیل میں رکھا گیا، 3 بائی 6 کا سیل اور واش روم بھی وہیں تھا، دیگر قیادت اڈیالہ جیل میں ہے۔
