لندن(مانیٹرنگ ڈیسک)برطانیہ نے پاکستان سمیت دنیا بھر سے ہنر مندوں کے لیے امیگریشن کے دروازے کھول دیے اور اس اقدام کی وجہ یہ بتائی جارہی ہے کہ برطانیہ کو ان دنوں افرادی قوت کی شدید کمی کا سامنا ہے،اسی کمی کو پورا کرنے کے لیے برطانیہ نے پاکستان سمیت دنیا بھر سے ہنر مندوں کے لیے امیگریشن کے دروازے کھول دیے ہیں۔
سرکاری مراسلے میں کہا گیا ہے کہ برطانیہ میں موجود طلبہ،تعلیم کے بعد کام کرنے والی سہولت سے فائدہ اٹھا سکتے ہیں،اعلی تعلیم یافتہ ہنر مندوں کے لیے تنخواہوں میں 20فیصد اضافہ ہو گا،سرکاری مراسلے کے مطابق منظور شدہ افرادی قوت کی کمی کی کیٹیگری کے لیے ویزا فیس بھی کم رکھی گئی ہے۔
مراسلے میں مزید کہا گیا ہے کہ امیگریشن میں پہلی مرتبہ 226 کیٹیگریز کو شامل کیا گیا ہے،تمام کیٹیگریز کے لیے برطانیہ میں کم ازکم اجرت میں بھی اضافہ کر دیا گیا ہے،امیگریشن کیٹیگری میں پہلی مرتبہ پولیس افسران، صحافیوں،ججوں،خفیہ افسران،بیرسٹروں،وکلا اور فلائٹ پائیلٹس بھی شامل ہیں،افرادی قوت کی کمی کی کیٹیگری میں موسیقار،ڈانسر،ڈاکٹرز،اداکار اور سائنس دانوں سمیت 31 کیٹیگریز بھی مختص کی گئی ہیں،ڈرائیورز،انسٹرکٹرز،ریلوے سٹیشن اسسٹنٹس،ائیرہوسٹس،کیبن کریو،وٹنری ڈاکٹرز،درزی بھی برطانیہ منتقل ہو سکیں گے جبکہ مستری،مزدور، ائیرکرافٹ انجینئرز،اے سی فریج انجینئرز،ویلڈرز،چیریٹی افسران اور سٹیٹ ایجنٹس کیلئے بھی مواقع ہیں۔
