نئی دہلی(مانیٹرنگ ڈیسک) بھارت میں ایک شخص نے کروڑوں روپے خرچ کر کے اپنی والدہ کو خراج عقیدت پیش کرنے کے لیے مشہور زمانہ تاج محل طرز کی عمارت تعمیر کرادی، جس کے لیے سنگ مرمر راجستھان سے منگوایا۔ انہوں نے بتایا کہ عمارت کی تعمیر میں دو سال کا عرصہ لگا۔
بھارت کے موقر انگریزی اخبارات ہندوستان ٹائمز اور دی ہندو کے مطابق بھارتی ریاست تمل ناڈو کے شہر چنئی کے رہائشی امر الدین شیخ داود نے اپنی والدہ کو خراج عقیدت پیش کرنے کے لیے تاج محل جیسی عمارت تھرووارور میں تعمیر کرائی تو اس پر پانچ کروڑ روپے خرچہ آیا۔میڈیا رپورٹس کے مطابق امرالدین شیخ داود نامی کاروباری شخص کا کہنا ہے کہ وہ جب محض گیارہ سال کے تھے تو ان کے والد عبدالقادر کا انتقال ہو گیا تھا جس کے بعد ان کی پرورش کی مکمل ذمہ داری والدہ جیلانی بیگم نے ادا کی۔
میڈیا رپورٹس کے مطابق امرالدین کا کہنا ہے کہ اس چھوٹے تاج محل پر ہر مذہب سے تعلق رکھنے والے لوگ ان کی والدہ کو خراج عقیدت پیش کرنے کے لیے آسکتے ہیں۔یاد رہے کہ بھارتی ریاست مدھیہ پردیش کے شہر برہان پور میں بھی ایک انجئینیر نے اپنی بیوی کی محبت میں ایک اور تاج محل بنوایا تھا۔
