کونیا(مانیٹرنگ ڈیسک) ترکیہ کی معروف کاروباری شخصیت آدم دورماز اور سوزدار یگیزار نے اپنی شاہانہ شادی کی ایک نئی روایت قائم کر دی،دلہن کو 4 کلو سونے سے تیار مختلف طرز کے زیورات پہنائے گئے جبکہ دولہا کو 6 ملین ترکیہ لیرہ (ساڑھے 6کروڑ سے زائد پاکستانی روپے)کی سلامی دی گئی۔
عرب میڈیا کے مطابق آدم دورماز اور سوزدار یگیزار کا تعلق ترکیہ کے امیر ارتوشی قبیلے سے ہے، دونوں کی شادی میں عراق، ایران، جرمنی اور سوئٹزرلینڈ سمیت ترکیہ سے 5ہزار مہمانوں نے شرکت کی،مہمانوں کی تواضع بھی شاہانہ مینیو سے کی گئی مہمانوں کے کھانے کے لیے100بکریاں ذبح کی گئیں،کھانے کے مینیو کے طور پر مہمانوں کو چاول،زاتزکی اور مٹھائیاں پیش کی گئیں۔دوسری جانب تقریب میں مقامی فنکاروں کی جانب سے ترکیہ اور کرد گانوں کے ساتھ رقص کے بعد جیولری پارٹی کا انعقاد بھی کیا گیا تھا۔
