پشاور(مانیٹرنگ ڈیسک)ضلع خیبر کی تحصیل باڑہ میں پولیس اسٹیشن کے مرکزی گیٹ پر خودکش دھماکہ، دو پولیس اہلکار شہید ، 10 افراد زخمی ہوگئے۔نجی ٹی وی کے مطابق دھماکے میں شہید ہونے والے اہلکاروں میں نور بہادر اور طیب شامل ہیں۔دہشتگرد حملے کے بعد سیکیورٹی اہلکاروںنے جوابی کارروائی کی اور دونوں جانب سے شدید فائرنگ کا تبادلہ دیر تک جاری رہا ۔اس دوران پولیس کی مزید نفری اور ریسکیو ٹیمیں موقع پر موجود رہیں۔سینیئر پولیس افیسر نے میڈیا کو بتایا کہ باڑہ تحصیل میںدو خودکش حملہ آوروں نے گھسنے کی کوشش کی لیکن فوری جوابی کارروائی سے حملہ آوروں کو مار دیا گیااور حملہ ناکام بنایا گیا۔
ریسکیو ٹیم کے مطابق زخمیوں میں پولیس اہلکار بھی شامل ہیں جو تحصیل کمپاونڈ آفس کے مین گیٹ پر تعینات تھے، ایک زخمی کو ایچ ایم سی، 3 زخمیوں کو مقامی اسپتال اور 6 زخمیوں کو موقع پر طبی امداد فراہم کی گئیں۔ دھماکے سے عمارت کی چھت گرنے سے ایک شخص نیچے دب گیا، ریسکیو 1122 کی ہیوی مشینری موقع کی جانب روانہ کر دی گئی۔ترجمان ایچ ایم سی نے بتایا کہ خیبر باڑہ بازار میں دھماکا کے باعث 4 زخمیوں کو لایا گیا جس میں ڈیڈ باڈی بھی شامل تھی، 4 زخمیوں میں 3 پولیس اہلکار شامل ہیں۔
یہ بھی پڑھیں : قرآن کی ایک بار پھر بے حرمتی کی اجازت،عراقیوں نے سویڈش سفارتخانے کو آگ لگا دی
