فیصل آباد(وقائع نگار خصوصی)وزیر اعظم شہباز شریف نے سپریم کورٹ کے سابق چیف جسٹس(ر)ثاقب نثار کو میاں نواز شریف کے خلاف سازش کا سرغنہ قرار دیتے ہوئے کہا ہے کہ پاناما میں 400 لوگوں کے نام تھے،نوازشریف کا تو پاناما میں نام بھی نہیں تھا لیکن ان کے خلاف سازش کی گئی اور اس سازش میں ثاقب نثار ٹولے کا سرغنہ تھا،میں نے اس وقت کہا کہ یاد رکھنا وہ وقت آئے گا جب پاکستان تحریک انصاف( پی ٹی آئی)چیئرمین اپنا مکروہ چہرہ دکھائے گا تو نواز شریف فرشتہ نظر آئے گا۔
یہ بھی پڑھیں:190ملین پاونڈ سکینڈل کیس،وزیر اعظم شہباز شریف نے ایسی بات کہہ دی کہ عمران خان بھی مسکرا اٹھیں
”پاکستان ٹائم“ کے مطابق وزیر اعظم شہباز شریف نے فیصل آباد میں ستیانہ روڈ پر موٹروے انٹر چینج کا افتتاح کر دیا، اس موقع پر وزیر داخلہ رانا ثنااللہ،وزیر اطلاعات مریم اورنگزیب،طلال چوہدری اور اسعد محمود بھی شریک تھے۔شہباز شریف کی تقریر کے دوران کارکنوں نے نعرے بازی کی،جس پر وزیر اعظم نے رانا ثنااللہ کو مخاطب کرتے ہوئے کہا کہ رانا صاحب سے کہوں گا کہ جلسے کے بعد ان سب کو سری پائے کھلائیں۔تقریب سے خطاب کرتے ہوئے وزیر اعظم شہباز شریف کا کہنا تھا کہ الیکشن کی آمد آمد ہے،فیصل آباد والوں نے 2018 میں دھاندلی کے ذریعے آنے والوں کو شکست دینی ہے اور گزشتہ انتخابات کا بدلہ لینا ہے، 2018 کے انتخابات میں راتوں رات آر ٹی ایس بند کیا گیا،پنجاب میں ن لیگ کی حکومت کا راستہ روکا گیا،وفاق میں لوگوں کو ادھر ادھر کیا گیا،وہ شخص دن رات چور ڈاکو کی گردان کرتا رہا، 4 سال میں اس نے کیا کیا ہے،جو کہتا تھا کہ آوں گا تو ہسپتال اور یونیورسٹیوں کا جال پھیلا دوں گا، 300 ارب باہر جانے والی رقم سے ایک پائی بھی واپس آئی،اس نے کہا کہ مر جاوں گا آئی ایم ایف نہیں جاوں گا،آئی ایم ایف سے معاہدہ کر کے اسے توڑ دیا، اور سارا بوجھ ہماری حکومت پر ڈالا، 2013 سے 2018 تک معیشت راکٹ کی طرح اوپر جا رہی تھی، پاناما میں 400 لوگوں کے نام تھے،نوازشریف کا تو پاناما میں نام بھی نہیں تھا لیکن ان کے خلاف سازش کی گئی اور اس سازش میں ثاقب نثار ٹولے کا سرغنہ تھا،میں نے اس وقت کہا کہ یاد رکھنا وہ وقت آئے گا جب پی ٹی آئی چئیرمین اپنا مکروہ چہرہ دکھائے گا تو نواز شریف فرشتہ نظر آئے گا۔
وزیر اعظم نے کہا کہ پاکستان کی تاریخ کا سب سے بڑا سیلاب آیا،ہم نے دن رات کام کیا، 100 ارب روپے کی امداد دی، مولانا فضل الرحمان نے ترقیاتی منصوبوں کے لیے کام کیا،ن لیگ اور جے یو آئی کا تعلق آئندہ بھی چلتا رہے گا،ہمیں مجبورا آئی ایم ایف کی شرط پوری کرنا تھی تاہم 201 یونٹ تک بجلی استعمال کرنے والوں کے لیے کوئی اضافہ نہیں کیا گیا،اگر انتخابات میں عوام نے ن لیگ کو ووٹ دیا تو پاکستان کو ترقی کے سفر پر گامزن کر دیں گے،ہم جان لڑا دیں گے اور پاکستان کو کھویا ہوا مقام واپس دلائیں گے لیکن یہ کام جادو ٹونے یا موم بتی اور لالٹین جلانے سے نہیں ہو گا، نواز شریف کی قیادت میں ادنی ورکر کے طور پر کروڑوں بچوں بچیوں کو لیپ ٹاپ دیں گے،ہزاروں،لاکھوں ایکڑ زمین کو آباد کریں گے، ایسا نہیں ہوگا کہ 190 ملین پاونڈ کا فراڈ کر کے قوم کو چور ڈاکو کی گردان کرتے رہیں،گھڑی اور تحفے بیچ کر جیب میں ڈالنے والے پیسے دانش سکول کے بچے بچیوں کو دے دیتے تو آپ کو سلام کرتا،یہ 50 ارب روپیہ پاکستان کے خزانے میں کیوں نہیں آیا،اگر آپ نے فراڈیوں اور گردن میں سریے والوں کی بات سننی ہے تو ملک کا خدا حافظ۔
