اسلام آباد(وقائع نگار خصوصی) مسلم لیگ ن کے ناراض رہنما اور سابق وزیر اعظم شاہد خاقان عباسی نے کہا ہے کہ عمران خان کو عدالتوں سے زبردستی نا اہل کروایا گیا تو اس کے منفی اثرات مرتب ہوں گے،مسلم لیگ ن کے پسندیدہ اور نواز شریف کے لاڈلے ہونے کا تاثر انتخابات کو متنازع بنا رہا ہے۔
”پاکستان ٹائم“کے مطابق امریکی خبر رساں ادارے کو انٹرویو دیتے ہوئے شاہد خاقان عباسی کا کہنا تھا کہ نواز شریف کو خاموشی ترک کر کے عوام کو اپنی سوچ کے متعلق بتانا چاہئے وہ ملک و سیاست کو کس سمت پر لے کر جانا چاہتے ہیں؟ مسلم لیگ ن کے پسندیدہ اور نواز شریف کے لاڈلا ہونے کے تاثر انتخابات کو پہلے سے متنازع بنا رہا ہے،فوج،عدلیہ اور سیاست دان الیکشن سے قبل راستے کا تعین کریں۔انہوں نے کہا کہ مستقبل کے راستے کا تعین کیے بغیر الیکشن کے بعد بھی استحکام نہیں آئے گا،انتخابات میں تاخیر ملک کے مفاد میں نہیں ہے۔
