پشاور(بیورو رپورٹ)پاکستان تحریک انصاف پارلیمینٹیرین(پی ٹی آئی پی) کے چیئرمین اور سابق وزیر دفاع پرویز خان خٹک نے کہا ہے کہ بیرسٹر گوہر علی ڈیڑھ سال پہلے پارٹی میں شامل ہوئے،شاید گوہر علی خان کے پاس تحریک انصاف کی رکنیت کا کارڈ بھی نہیں ہو گا،آج پاکستان تحریک انصاف کا منعقدہ انٹرا پارٹی انتخاب سب سے بڑا جعلی الیکشن تھا۔
”پاکستان ٹائم“کے مطابق پشاور میں منعقدہ تقریب میں پرویز خٹک نے تحریک انصاف کے انٹرا پارٹی انتخابات پر تنقید کرتے ہوئے کہا کہ 2012 میں پی ٹی آئی انٹرا پارٹی الیکشن میں ایک سال لگا تھا لیکن آج کے الیکشن میں ایک تماشا لگایا گیا،یہ پہلے پارٹی کے شفاف الیکشن کروائیں پھر عام انتخاب کی بات کریں،پی ٹی آئی میں بہت سینئر سیاستدان ہیں، بیرسٹر گوہر ڈیڑھ سال پہلے پارٹی میں شامل ہوئے،شاید گوہرعلی خان کے پاس پارٹی کی رکنیت کا کارڈ بھی نہیں ہو گا۔انہوں نے کہا کہ ملک کو اس حال میں کس نے پہنچایا؟حکمرانوں نے قرضے نہ لیے ہوتے تو آج یہ صورتحال نہ ہوتی، حکمراں قرض ملنے پر خوشیاں مناتے ہیں،قرض دینے والا اپنی مرضی کی شرائط عائد کرتا ہے،پوچھنا چاہیے ملک میں کارخانے کیوں نہیں لگے،تمام پالیسیوں کی ذمہ دار وفاقی حکومت ہے،سیاستدان عوام کو پھر سہانے خواب دکھا رہے ہیں،ہم نے عوام سے جو وعدے کیے وہ پورے بھی کیے،اپنی پارٹی میں اچھے لوگوں کو لا رہے ہیں،میں نے 5 سال صوبے کی خدمت کرتے ہوئے پختونخوا میں ریفارمز لانے کی کوشش کی۔پرویز خان خٹک نے کہا کہ بے ایمان سیاستدان اقتدار میں آکر ملک کو لوٹتے ہیں،میں نہ حرام کھاتا ہوں نا کسی کو کھانے دیتا ہوں،پختونخوا کے 200 ارب وفاق نے روکے ہوئے ہیں،موقع ملا تو صوبے کو اس کا حق دلائیں گے،پوری امید ہے 8 فروری کو عام انتخابات ہوں گے،آئین کے مطابق وفاق سے صوبے کا حق لینا جانتا ہوں، 18 ویں ترمیم کو کوئی ختم نہیں کر سکتا۔
