راولپنڈی (خصوصی رپورٹر) اڈیالہ جیل میں سائفر کیس کی سماعت،عدالت کا سابق وزیر اعظم عمران خان اور شاہ محمود قریشی پر 12دسمبر کو فرد جرم عائد کرنے کا فیصلہ۔
یہ بھی پڑھیں :سابق وزیر شوکت یوسفزئی اشتہاری قرار
”پاکستان ٹائم“کے مطابق سائفر گمشدگی کیس میں پاکستان تحریک انصاف(پی ٹی آئی) کے بانی چیئرمین عمران خان اور سابق وزیر خارجہ شاہ محمود قریشی پر فرد جرم عائد کرنے کے لیے 12 دسمبر کی تاریخ مقرر کر دی جبکہ عمران خان نے ٹرائل کے دوران جنرل (ر)قمر جاوید باجوہ کو بطور گواہ بلانے کا کہا ہے۔اڈیالہ جیل راولپنڈی میں آفیشل سیکریٹ ایکٹ کے تحت خصوصی عدالت کے جج ابو الحسنات ذوالقرنین نے سائفر کیس کی سماعت کی۔دوران سماعت عمران خان اور شاہ محمود قریشی کو عدالت میں پیش کیا گیا۔عدالتی کارروائی کے دوران میڈیا کے 6 نمائندگان اور ملزمان کے اہل خانہ بھی کمرہ عدالت میں موجود تھے۔عمران خان کے وکیل کے تاخیر سے آنے پر عدالت نے برہمی کا اظہار کرتے ہوئے کہا کہ ڈیڑھ گھنٹے سے انتظار کر رہا ہوں وکیل نہیں پہنچے۔وکیل عثمان گل نے عدالت کو بتایا کہ دھند کی وجہ سے تاخیر سے پہنچے ہیں۔اس موقع پر شاہ محمود قریشی نے کہا کہ آئندہ سماعت نو بجے شروع کی جائے جس پر عدالت نے ریمارکس دیے کہ آپ اپنے وکلا کو کہیں کہ جلدی آئیں تو سماعت بھی جلدی شروع ہو گی۔عدالت نے ہدایت کی کہ دونوں فریقین باہمی مشاورت سے سماعت کا ایک وقت مقرر کر لیں۔دوران سماعت عدالت نے وکلا کو ہدایت کی کہ دستاویزات دیکھ لیں،ساری مکمل ہیں؟پھر نقول تقسیم کی جائیں گی۔اس پر عمران خان کے وکیل نے موقف اپنایا کہ عدالتی سماعت کے لیے جاری نوٹیفکیشن میں قانونی تقاضے پورے نہیں کیے گئے،جب تک نیا نوٹیفکیشن جاری نہیں ہوتا کارروائی آگے نہیں بڑھ سکتی۔عدالت نے ریمارکس دیے کہ اسلام آباد ہائیکورٹ کا ڈویژن بینچ جج تعیناتی کا نوٹیفکیشن درست قرار دے چکا ہے،آپ کے جو دلائل ہیں وہ ہم اپنے آرڈر میں لکھ دیں گے،مجھے قانون پر عمل درآمد کرانا اور قانون پر چلنا ہے،آج نقول فراہمی کے لیے سماعت مقرر تھی آپ بتائیں لینی ہیں یا نہیں؟عدالت نے دلائل مکمل ہونے کے بعد چالان کی نقول تقسیم کر دیں۔دوران سماعت عمران خان نے بیان دیا کہ میں ٹرائل کے دوران جنرل(ر)قمر جاوید باجوہ کو بطور گواہ بلاوں گا جبکہ امریکی سفارت خانے سے بھی نمائندہ بلاوں گا۔فریقین کے دلائل سننے کے بعد عدالت نے سائفر کیس میں ملزمان پر فرد جرم عائد کرنے کے لیے 12 دسمبر کی تاریخ مقرر کر دی۔اس سے قبل ایف آئی اے نے سائفر کیس میں چالان آفیشل سیکرٹ ایکٹ کی خصوصی عدالت میں جمع کروا دیا تھا جس میں عمران خان اور شاہ محمود قریشی کو قصور وار قرار دیا گیا ہے۔
