راولپنڈی (وقائع نگار خصوصی)پاکستان تحریک انصاف کے بانی چیئرمین اور سابق وزیر اعظم عمران خان نے کہا ہے کہ جیل میں مجھے کوئی پریشانی نہیں،قوم کے نام پیغام دینا چاہتا ہوں کہ آپ کا کپتان آخری سانس تک لڑنے کو تیار ہے۔
”پاکستان ٹائم“کے مطابق اڈیالہ جیل راولپنڈی میں سائفر کیس کی سماعت سے قبل عمران خان نے کمرہ عدالت میں موجود میڈیا سے غیررسمی گفتگو کرتے ہوئے کہا کہ چند سیاسی رہنماوں کا پارٹی چھوڑنے پر شکر گزار ہوں،آئندہ انتخابات پی ٹی آئی ہی جیتے گی۔اس موقع پر ایک صحافی نے سوال کیا کہ آپ سے کسی نے مذاکرات کیے ہیں؟جس پر عمران خان نے جواب دیا کہ مجھ سے کوئی ملا اور نہ ہی مذاکرات کیے گئے۔حالات بتاتے ہیں کہ آپ کو طویل عرصے تک جیل میں رہنا پڑے گا؟اس سوال پر عمران خان نے کہا کہ مجھے کوئی فرق نہیں پڑتا،میں جان دینے کو تیار ہوں،نو مئی لندن پلان کا حصہ تھا،مجھے غیر آئینی طور پر پکڑا گیا، 48 گھنٹوں میں 10 ہزار لوگوں کو گرفتار کیا گیا،یاسمین راشد واضح طور پر کہہ رہی ہیں کہ لوگ کور کمانڈر ہاوس کے اندر نہ جائیں،سی سی ٹی وی دیکھ لیں،ان کو کون اندر لے کر گیا؟لندن پلان نواز شریف کو لانے،ہمیں جیلوں میں ڈالنے اور پی ٹی آئی کو ختم کرنے کے لیے تھا۔عمران خان کا کہنا تھا کہ انہوں نے بشریٰ بی بی کے سابق خاوند(خاور مانیکا) کے ذریعے جو کام کرایا ہے،جھوٹا الزام لگایا ہے،یہ اخلاق سے انتہائی گرے ہوئے لوگ ہیں،قسم اٹھانے کے لیے تیار ہوں،قرآن پر ہاتھ رکھنے کے لیے تیار ہوں کہ بشریٰ بی بی کو اس دن دیکھا جس دن میرا نکاح ہوا۔عمران خان نے کہا کہ قوم کو پیغام دینا چاہتا ہوں کہ آپ کا کپتان آخری سانس تک لڑنے کے لیے تیار ہے،میں آپ کو واضح کر رہا ہوں کہ انتخابات پی ٹی آئی ہی جیتے گی،مجیب الرحمان نے 162 سیٹیں جیتی تھیں،اس کے خلاف انہوں نے کیا کیا؟حالات دیکھ کر خدشہ ہے کہ کہیں یہ الیکشن سے بھاگ ہی نہ جائیں،یہ چھ اشاریہ ایک سات کی گروتھ کو صفر پر لے آئے ہیں،لوگ کیا پاگل ہیں؟انہیں نہیں پتہ کہ انہوں نے کیا کِیا ہے؟۔
یہ بھی پڑھیں : ”قید پر پریشان نہیں اسے عبادت سمجھتا ہوں “میری گرفتاری لندن پلان کا حصہ ہے ،عمران
