لاہور(سٹاف رپورٹر)پاکستان مسلم لیگ ن کے رہنما اور سابق وزیر عطاء اللہ تارڑ نے کہا ہے کہ جیل ٹرائل کے دوران عمران خان نے امریکہ پر بغیر ثبوت الزام لگائے لہذا سابق چیئرمین پاکستان تحریک انصاف(پی ٹی آئی)کے خلاف کارروائی ہونی چاہئے۔
”پاکستان ٹائم“کے مطابق لاہور میں میڈیا سے گفتگو کرتے ہوئے سابق مشیر داخلہ عطاء اللہ تارڑ کا کہنا تھا کہ پی ٹی آئی نے پروپیگنڈا پھیلانے میں پی ایچ ڈی کی ہوئی ہے،پی ٹی آئی نے ایک جھوٹا سوشل میڈیا اکاونٹ بنا رکھا تھا جو ن لیگ کے خلاف پروپیگنڈا کرتا ہے،تحریک انصاف غلط بیانی سے کام لے رہی ہے،یہ لوگ اتنا ڈھٹائی سے جھوٹ بولتے ہیں کہ سچ کا گمان ہو۔انہوں نے کہا کہ آفیشل سیکریٹ ایکٹ کے تحت قائم کی گئی خصوصی عدالت میں سابق چیئرمین پی ٹی آئی نے جیل میں جو باتیں کیں اس پرحیران ہوں،دوران ٹرائل وہی پرانی باتیں کیں جو آفیشل سیکریٹ ایکٹ کی خلاف ورزی ہے،آپ بغیر ثبوت کے امریکہ پر الزامات لگا رہے ہیں،ہم تمام ممالک سے اچھے تعلقات چاہتے ہیں لہٰذا بانی پی ٹی آئی نے پرسوں جو جرم کیا اس پر تو کارروائی ہونی چاہیے۔عطاء اللہ تارڑ کا کہنا تھا کہ الیکشن پروسیس میں ہر جماعت اپنا مرحلہ بروقت مکمل کر لیتی ہے جب کہ ہم نے ہمیشہ کوشش کی بروقت پارلیمانی بورڈ کی کارروائی کی جائے۔
