ڈاکٹر عافیہ صدیقی سے امریکی جیل میں زیادتی کا معاملہ،پاکستانی حکومت کی غیرت کو بھی جوش آ گیا

اسلام آباد(سٹاف رپورٹر)امریکی جیل میں سالہا سال سے قید دخترپاکستان ڈاکٹر عافیہ صدیقی سے جیل میں زیادتی کی خبریں منظر عام پر آنے کے بعد پاکستانی حکومت کی غرت کو بھی جوش آ گیا ہے اور اس حوالے سے نگران وزیراعظم کی جانب سے پاکستانی دفتر خارجہ کو بڑا حکم جاری کر دیا گیا ہے ۔
”پاکستان ٹائم“کے مطابق ترجمان دفتر ممتاز زہرا بلوچ نے کہا ہے کہ جو بیانات ڈاکٹر عافیہ کے حوالے سے دئیے گئے ہیں وہ سنجیدہ نوعیت کے ہیں، وزیر اعظم نے ہدایت دی ہے کہ یہ معاملہ امریکی محکمہ خارجہ سے اٹھا کر اسکی تحقیقات کرائی جائیں،ڈاکٹر عافیہ صدیقی اور تمام پاکستانیوں کی خیریت ہماری اولین ترجیح ہے۔دہشت گردی کے حوالے سے امریکی رپورٹ مسترد کرتے ہوئے ترجمان دفتر ممتاز زہرا بلوچ نے کہا کہ پاکستان نے دہشت گردی اور اس کی مالی معاونت کے خلاف جو اقدامات کئے انہیں دنیا نے تسلیم کیا،رواں ہفتے امریکی وفود کے دوروں کا سلسلہ جاری ہے جن کا مرکز صرف افغانستان نہیں ہے۔ایک سوال پر ان کا کہنا تھا سابق معاون خصوصی شہزاد اکبر پر حملے کی خبریں دیکھی ہیں،انہوں نے اس حوالے سے پاکستانی ہائی کمیشن سے مدد نہیں لی،اس واقعے میں پاکستانی ایجنسیوں کے ملوث ہونے کے الزامات کو سختی سے مسترد کرتے ہیں۔انہوں نے کہا کہ افغان وزیر کے پاکستانی پاسپورٹ کے استعمال کے بارے میں ابھی رپورٹ دیکھی ہے۔اس پر حقائق سامنے آنے کے بعد جواب دیا جائے گا، بھارتی وزیر داخلہ امیت شاہ سمیت بھارتی قیادت کے کشمیر پر غیر ذمہ دارانہ بیانات قابل مذمت ہیں کشمیر اقوام متحدہ کے ایجنڈے پر حل طلب مسئلہ کے طور پر موجود ہے۔ترجمان نے بتایا پاکستان غزہ میں اسرائیل کی جانب سے سویلین اہداف کے خلاف طاقت کے استعمال کی شدید مذمت کرتا ہے،اقوام متحدہ سیکرٹری جنرل کے مطابق غزہ میں شہریوں کو شدید خطرات لاحق ہیں۔پاکستان اسرائیل کی طرف سے غزہ میں جاری طاقت کے مسلسل استعمال کی مذمت کرتا ہے،غزہ میں صورتحال تیزی سے خراب ہورہی ہے،اقوام متحدہ کے سیکرٹری جنرل کی طرف سے اس صورتحال کو ختم کرنے کی آواز کیساتھ ہیں ،اقوام متحدہ آرٹیکل 99 امن و سلامتی کے حوالے سے سیکرٹری جنرل کے اختیارات کا ضامن ہے۔