شانگلہ (بیورو رپورٹ) پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری نے اعتراف کرتے ہوئے کہا ہے کہ کوئی ایسا سیاستدان نہیں ہے جس کا ہاتھ صاف ہو،ہمیں ٹک ٹاک،گالم گلوچ اور گیٹ نمبر چار کی سیاست نہیں آتی،ہمارا کوئی سیاسی دشمن اور مخالف نہیں،پیپلزپارٹی کا مقابلہ غربت،مہنگائی اور بیروزگاری سے ہے۔
”پاکستان ٹائم“کے مطابق شانگلہ میں ورکرز کنونشن سے خطاب کرتے ہوئے بلاول بھٹو زرداری کا کہنا تھا کہ آج بھی بی بی شہید کے جیالے میدان میں ہیں،جیالے بی بی کا نامکمل مشن مکمل کرنے کیلئے جدوجہد کر رہے ہیں،ایک طرف نفرت اور تقسیم کی سیاست عروج پر ہے، دوسری طرف معاشی بحران بدترین ہوتا جا رہا ہے۔بلاول بھٹو زرداری نے کہا کہ ملک میں عوام کو مشکلات کا سامنا ہے، پرانے سیاستدان آج بھی پرانی اور انا کی سیاست کر رہے ہیں، سیاست کو ذاتی دشمنی تک پہنچا دیا گیا ہے،مہنگائی میں دن بدن اضافہ ہو رہا ہے،پرانی سیاست کی وجہ سے عوام کے مسائل میں کوئی دلچسپی نہیں، سیاسی جماعتوں کے پاس مسائل کے حل کیلئے کوئی پلان نہیں،پیپلزپارٹی نے عوام کو ماضی میں بھی مشکلات سے نکالا،آج بھی عوام کو روٹی،کپڑا اور مکان دلوا سکتے ہیں،میں کسی اور کی طرف نہیں دیکھنا چاہتا، میں صرف عوام پر بھروسہ کرتا ہوں،عوام سے مدد مانگتا ہوں۔انہوں نے کہا کہ سب سیاستدانوں کا اصل چہرہ عوام کے سامنے آچکا ہے، ذاتی طور پر وہ اچھے لوگ ہوں گے مگرعوام کے مسائل کا حل ان کے پاس نہیں،ہم نے انا،انتقام اور تقسیم کی سیاست کو دفن کرنا ہے،ہم نے ایسی سیاست کرنی ہے جس سے عوام مضبوط ہو،معاشی ترقی کیلئے معیشت کو عوام مفاد کے تحت چلانا ہو گا،کوئی ایسا سیاستدان نہیں جس کا ہاتھ صاف ہو،پاکستان کی سیاست میں ہاتھ صاف رکھنا مشکل ہوتا ہے،موقع ملا تو تنخواہ میں اضافہ کریں گے،ہم کسانوں کو خوشحال کریں گے،روزگار کا وعدہ ہر سیاستدان کرتا ہے،ہم نے روزگار اور تبدیلی والا نعرہ حقیقت کر کے دکھایا،روزگار کے حوالے سے بی بی شہید پر کیسز بنائے گئے،کہا گیا آپ نے ملکی وسائل پر ڈاکا ڈالا۔