کوہاٹ(بیورو رپورٹ)پاکستان پیپلز پارٹی کے چیئرمین بلاول بھٹو زرداری نے کہا ہے کہ جس طرح قائد عوام شہید ذوالفقار علی بھٹو نے مزدوروں کو ان کا حق پہنچایا، ہم بھی ویسے ہی ان کو ان کا حق پہنچائیں گے،میرا مقصد صرف عوام کے لئے الیکشن لڑنا ہے،قوم کو بتانا ہو گا کہ قائد عوام کے قتل میں سہولت کار کون تھا؟آمر اور کچھ سیاست دان شہید بھٹو کے قتل کے سہولت کار تھے،ایک شخص جیل سے نکلنے کے لیے الیکشن لڑنا چاہتا ہے،پیپلز پارٹی کا مقابلہ نہ تو کوئی کھلاڑی کر سکتا ہے نا کوئی اور۔
کوہاٹ میں جلسے سے خطاب کرتے ہوئے چیئرمین پیپلزپارٹی بلاول بھٹو زرداری کا کہنا تھا کہ ہمیں کے پی میں کنونشن نہ کرنے کا کہا گیا اور کہا گیا کہ صوبے میں سیکیورٹی خطرات ہیں،کہا گیا کے پی میں کسی اور کو وزیر اعلیٰ بنانے کا فیصلہ ہو چکا ہے لیکن میں یہاں کے کارکنوں اور امیدواروں کا شکر گزار ہوں،ہماری جماعت کے ورکرز کنونشن تمام خدشات کے باوجود کامیاب رہے اور ثابت ہوا کہ کے پی میں بھٹو زندہ ہے اور رہے گا۔انہوں نے کہا کہ جیالے ہمیشہ الیکشن کے لیے تیار ہیں،ملک کے تمام مسائل کا حل پیپلز پارٹی کے منشور میں موجود ہے،ہمارا کوئی سیاسی مخالف نہیں،ہمارا مقابلہ سیاستدانوں سے نہیں غربت اور مہنگائی سے ہے،پیپلز پارٹی کے جیالے مشکل وقت میں پارٹی کے ساتھ ہیں،یہ جماعت اشرافیہ کی نہیں عوام کی جماعت ہے،روٹی،کپڑا اور مکان نعرہ غریب کے مسائل حل کرنے کے لیے دیے، چاہتے ہیں گھر گھر صحت کی سہولیات پہنچائیں۔بلاول بھٹو زرداری کا کہنا تھا کہ ایک شخص جیل سے نکلنے کے لیے الیکشن لڑنا چاہتا ہے،پیپلز پارٹی کا مقابلہ نہ تو کوئی کھلاڑی کر سکتا ہے نا کوئی اور،فروری میں پرانی اور تقسیم کی سیاست کو دفن کر دیں گے،کوئی تیار نہ ہو،ہم الیکشن کے لیے تیار ہیں۔
