ابوظبی (سپورٹس ڈیسک) نیو یارک سٹرائیکرز نے گزشتہ ایڈیشن کے فائنل میں دکن گلیڈی ایٹرز کے ہاتھوں شکست کا بدلہ لیتے ہوئے 7ویں ایڈیشن میں ابوظبی ٹی 10 کے نئے چیمپیئن کا تاج پہن لیا،یہ میچ انہوں نے 7 وکٹوں سے اپنے نام کیا۔

پاکستانی بلے باز آصف علی نے 25 گیندوں پر 48 رنز کی ناقابل شکست اننگز کھیلی اور ٹیم کو فتح سے ہمکنار کیا،ان کی اننگز میں 4 چھکے اور 2 چوکے شامل تھے۔انہوں نے کپتان کیرون پولارڈ کے چوتھی وکٹ کے لیے 29 گیندوں پر 56 رنز کی ناقابل شکست شراکت قائم کی۔پولارڈ نے 13 گیندوں پر ایک چوکے اور ایک چھکے کی مدد سے ناقابل شکست 21 رنز بنائے اور چار گیندیں باقی رہتے ہوئے فائنل جیت لیا۔اس طرح انہوں نے ٹرافی اٹھائی اور ایک لاکھ ڈالر انعامی رقم وصول کی۔نیو یارک سٹرائیکرز گزشتہ ایڈیشن میں ابوظبی ٹی 10 کا حصہ بنی تھی اور دونوں میں فائنل تک رسائی حاصل کی۔گلیڈی ایٹرز گزشتہ دو ایڈیشن کی فاتح تھی اور اس بار جیت کی ہیٹ ٹرک کرنے کی خواہش مند تھی تاہم اس کا یہ خواب پورا نہ ہو سکا اور اسے رنر اپ کے طور پر 50 ہزار ڈالر کی انعامی رقم ملی۔گلیڈ ی ایٹرز نے پہلے کھیلتے ہوئے مقررہ 10 اووز میں 5 وکٹوں کے نقصان پر 91 رنز بنائے سٹرائیکرز نے یہ سکور 9.2 اوور میں 3 وکٹوں کے نقصان پر پورا کر لیا۔ گزشتہ ایڈیشن میں گلیڈی ایٹرز نے سٹرائیکرز کو 37 رنز سے شکست دی تھی۔آصف علی کو مین آف دی میچ،عقیل حسین ٹورنامنٹ کے بہترین کھلاڑی اور باولر،ٹام کوہلر بہترین بلے باز اور محمد جواد اللہ یواے ای کے بہترین کھلاڑی قرار پائے۔