لاہور(وقائع نگار خصوصی)پاکستان مسلم لیگ ن کے قائد اور سباق وزیر اعظم میاں نواز شریف نے کہا ہے کہ اپنے زمانے میں ہم نے عالمی مالیاتی ادارے( آئی ایم ایف)کو خدا حافظ کہا تھا،غیر ملکی قرضے ہم واپس کر رہے تھے،اگر ترقی کی وہ رفتار جاری رہتی تو آج ہم بہت آگے ہوتے،یہی نہیں ہم دنیا میں ترقی یافتہ ممالک کی فہرست میں بھی بہت آگے پہنچ چکے ہوتے،ہم نے جو کہا اس پہ عمل کر کے دکھایا،میں صبح وزیر اعظم تھا شام میں ہائی جیکر بنا دیا گیا۔
”پاکستان ٹائم“کے مطابق مسلم لیگ ن کی پارلیمانی کمیٹی کے 12 ویں اجلاس سے خطاب کرتے ہوئے میاں نواز شریف کا کہنا تھا کہ کافی عرصے بعد اپنے بہت سارے ساتھیوں سے ملاقات ہو رہی ہے، بیچ میں کافی گیپ آ گیا، حالات کہاں سے کہاں لے گئے؟ وہم و گمان میں بھی نہیں تھا کہ بیٹے سے تنخواہ نہ لینے پر فارغ کر دیا جائے گا، تقریباً 1 لاکھ روپے تنخواہ نہ لینے پر مجھے فارغ کیا گیا، مقصد صرف وزیر اعظم کو نکالنا اور ایک سلیکٹڈ کو لانا تھا،2017 میں میرے وہم و گمان میں بھی نہیں تھا کہ مجھے بیٹے سے تنخواہ نہ لینے پر فارغ کردیا جائے گا لیکن آپ نے بھی دیکھا کہ ایسا ہوا،نہ قانون میں گنجائش تھی نہ آئین میں کوئی گنجائش تھی لیکن وزیراعظم کو نکالنا مقصود تھا تو نکال دیا گیا، بجلی کی لوڈ شیڈنگ ختم ہو رہی تھی، سی پیک پاکستان آ رہا تھا، کہا جا رہا تھا کہ پاکستان جی 20 میں شامل ہو جائے گا۔انہوں نے کہا کہ آئی ایم ایف کو ہم نے خدا حافظ کہا تھا، ہم غیر ملکی قرضے واپس کر رہے تھے، اپنے دور میں قرضے لیے نہیں واپس کیے تھے، ہم پاکستان میں وہ کام کر سکتے ہیں جو دوسری قومیں نہیں کر سکتیں، ہمیں نظر کھا گئی، کسی کو پوچھنا چاہیے تھا کہ صبح کا وزیرِ اعظم شام کو ہائی جیکر کیسے بن گیا؟ آر ٹی ایس بٹھا کر جو حکومت لائی گئی وہ ایک موٹر وے بھی نہ بنا سکی، اگر ہماری حکومت نہیں توڑی جاتی تو وہ موٹر وے بن جاتی، کس نے کراچی سے دہشت گردی کو ختم کیا؟ سندھ میں ہم نے کوئلہ نکالا، بجلی اس سے بن رہی ہے، کراچی میں ہم نے 2200 میگا واٹ کا پاور پلانٹ قائم کیا۔ چترال والوں سے پوچھوں گا کہ ٹنل مجھ سے بنواتے ہیں ووٹ کسی اور کو دیتے ہیں، کراچی سے حیدر آباد جو بنائی گئی وہ موٹر وے نہیں؟ کہتے ہیں نوازشریف نے کراچی میں امن قائم کیا اورسندھ والے ووٹ کسی اور کو دیں ، ادھر لواری ٹنل ہم نے بنائی ووٹ جماعت اسلامی کو پڑ گیا ،کراچی والو اپنے گریبان میں ذرہ جھانک کر دیکھو یہ کیا ہے؟کوئلے کے منصوبے لگانے کی باتیں سب کرتے تھے لیکن لگاتا کوئی نہیں تھا، ہم نے سندھ میں کوئلے کا منصوبہ لگایا اور اس کوئلے سے بجلی بنائی ،ہم نے جو کہا اس پہ عمل کرکے دکھایا، ہم ترقی لانے ،کام کرنے اور غریبوں کے دکھ درد بانٹنے والے لوگ ہیں۔
