اسلام آباد(بیورو رپورٹ)الیکشن کمیشن نے پابندی کے باوجود الیکشن سروے کرانے پر پاکستان الیکٹرانک میڈیا ریگولیٹری اتھارٹی (پیمرا)کو ٹیلی ویژن چینلز کے خلاف کارروائی کا حکم دے دیا ہے۔
”پاکستان ٹائم“کے مطابق الیکشن کمیشن آف پاکستان نے ارسال کردہ مراسلے میں چیئرمین پیمرا کو الیکشن سروے کرنے والے ٹی وی چینلز کیخلاف کارروائی کی ہدایت جبکہ اس حوالے سے فوری طور پر رپورٹ بھی طلب کی ہے۔پیمرا کو ارسال کیے گئے خط میں لکھا گیا ہے کہ میڈیا کیلئے جاری کردہ ضابطہ اخلاق کے تحت انتخابی سروے کرنے پر پابندی ہے۔ تاہم کئی ٹیلی ویژن چینلز مختلف حلقوں کے سروے کر رہے ہیں،جو ووٹرز پر اثر انداز ہونے کے مترادف ہیں۔واضح رہے کہ گذشتہ سال 3 نومبر 2023ء کو پاکستان الیکٹرانک میڈیا ریگولیٹری اتھارٹی(پیمرا) نے 8 فروری 2024ء کو ہونے والے الیکشن کیلئے تمام ٹی وی چینلز کو ہدایات جاری کی تھیں۔ پیمرا کی جانب سے جاری ہدایات کے مطابق ٹی وی چینلز کالعدم تنظیموں،ان کے نمائندوں یا کارکنوں کے بیان نشر نہیں کر سکتے تاہم اس کو صرف اس طرح صورت میں نشر کرنے کی اجازت ہوگی،جب اس کا مقصد کالعدم تنظیموں کے نظریات،مذہب کے غلط استعمال یا ان کی بربریت کو بے نقاب کرنا ہو۔پاکستان الیکٹرانک میڈیا ریگولیٹری اتھارٹی نے کہا کہ انتخابی عمل کو مضبوط بنانے،جمہوری اصولوں اور جمہوریت کیلئے یہ سب کی ذمہ داری ہے کہ وہ شفاف،منصفانہ اور آزاد الیکشن کے انعقاد کیلئے ہر حد تک تعاون اور سہولت فراہم کریں۔
