لاہور(سٹاف رپورٹر)پنجاب اسمبلی کی 20 خالی نشستوں پر ضمنی انتخابات میں سیکیورٹی خدشات پیش نظر الیکشن کمیشن نے لاہور کی 4 اور ملتان کی ایک نشست پر پولنگ سٹیشنوں کے باہر فوج کی تعیناتی کے لئے وزارت داخلہ کو مراسلہ ارسال کردیا۔
الیکشن کمیشن کی جانب سے جاری بیان کے مطابق الیکشن میں بد امنی کے خطرے کے پیش نظر کوئیک ریسپانس فورس کی تعداد اور فلیگ مارچ بڑھانے کی درخواست بھی کی گئی ہے۔مراسلہ میں وزارت داخلہ سے کہا گیا ہے کہ لاہور کے 4 اور ملتان کے 1 حلقے میں فوج کی پولنگ سٹیشن کے باہر تعیناتی یقینی بنائی جائے،
اس سے قبل رینجرز کی تعیناتی پر اتفاق ہوا تھا البتہ حالیہ رپورٹس کے مطابق بدامنی و تشدد کا خطرہ بڑھ چکا ہے۔دیگر حلقوں میں بھی قانون نافذ کرنے والے اداروں کو چوکس رہنے،الیکشن سے پہلے یا دوران تشدد کے واقعات کے سدباب کی ہدایت دی جائے۔خط میں کہا گیا ہے کہ پاکستان میں سیاسی درجہ حرارت کے بڑھنے اور پولرائزیشن کی وجہ سے یہ اقدامات ضروری ہیں ۔ اگر قبل از وقت پرتشدد واقعات کا سد باب نہ کیا گیا تو حالات قابو سے باہر ہو سکتے ہیں۔
