دبئی (فار ن ڈیسک )اماراتی فضائی کمپنی ’امارات ایئر لائنز‘ نے رواں سال چھ براعظموں سے پانچ ہزار افراد کا عملہ بھرتی کرنے کا اعلان کردیااور اس سلسلے میں مشرقِ وسطیٰ میں، بحرین، اردن، کویت، عمان، سعودی عرب اور متحدہ عرب امارات میں بھرتی کے پروگرام منعقد کئے جائیں گے۔ عرب میڈیا کے مطابق بھرتی کی مہم میں حالیہ گریجویٹس، ایک سالہ تجربے کے حامل مہمان نوازی کی صنعت کے پیشہ ور افراد اور جلد ہی گریجویٹ ہونے والے افراد پر توجہ مرکوز کی جائے گی، انٹرنشپ یا جز وقتی ملازمت کا تجربہ رکھنے والوں کو درخواست دینے کو کہا گیا ہے۔ ترجمان نے کہا کہ نئے بھرتی ہونے والے افراد اس شعبے کے بہترین تربیت کاروں سے مہمان نوازی اور زندگی کی مہارتیں سیکھیں گے۔
