راولپنڈی(مانیٹرنگ ڈیسک) آفیشل سیکرٹ ایکٹ عدالت نے عمران خان اور شاہ محمود قریشی کو سائفر کیس میں 10، 10 سال قید کی سزا سنادی۔
نجی ٹی وی کے مطابق آفیشل سیکرٹ ایکٹ عدالت کے جج ابو الحسنات محمد ذوالقرنین نے اڈیالہ جیل میں کیس کی سماعت کی۔ فاضل جج نے عمران خان اور شاہ محمود قریشی کو 342کے بیان کیلئے سوالنامہ اور اسٹیٹمینٹس کی کاپیاں فراہم کیں،سوالنامے میں ملزمان سے 36 سوالوں کے جواب مانگے گئے۔ دونوں سیاسی رہنماوں نے خود جوابات لکھوائے۔جج نے342 کا بیان قلمبند کرنے کے بعد سزا سنانے سے پہلے آخری سوال پوچھا عمران خان صاحب سائفر کہاں گیا،جواب میں عمران خان نے کہا کہ مجھے نہیں معلوم، سائفر میرے پاس نہیں بلکہ میرے دفتر میں تھا، میں نے اپنے بیان میں لکھوا دیا ہے، وزیراعظم آفس کی سیکیورٹی میری ذمہ داری نہیں تھی۔
