لاہور(سٹاف رپورٹر)ملک بھر میں عام انتخابات 2024 کیلئے پولنگ کا وقت ختم ہو گیا،تاہم جو لوگ پولنگ سٹیشن کے احاطے کے اندر موجود ہیں انہیں ووٹ ڈالنے کی اجازت ہو گی جبکہ پولنگ سٹیشن کے باہر موجود ووٹرز ووٹ نہیں ڈال سکیں گے،پولنگ کا عمل مکمل ہونے کے بعد کچھ ہی دیر میں ووٹوں کی گنتی شروع اور غیر حتمی غیر سرکاری نتائج آنے کا سلسلہ شروع ہو جائے گا،پولنگ کا عمل مجموعی طور پر پر امن رہا تاہم کئی مقامات پر لڑائی جھگڑے اور توڑ پھوڑ کے واقعات بھی رپورٹ ہوئے۔
”پاکستان ٹائم“کے مطابق ملکی تاریخ کے سب سے بڑے اور بارہویں انتخابات کیلئے ووٹنگ کا عمل شروع ہوتے ہی پولنگ سٹیشنز کے باہر قطاریں لگ گئیں، کروڑوں افراد نے اپنا حق رائے دہی استعمال کیا۔پولنگ صبح 8 بجے سے شام 5 بجے تک بغیر کسی وقفے کے جاری رہی، پولنگ سٹیشنز پر سکیورٹی کے خاص انتظامات کئے گئے جبکہ امن و امان برقرار رکھنے کیلئے پولیس، رینجرز اور پاک فوج کے دستے تعینات رہے۔قومی اسمبلی کی 265 اور صوبائی اسمبلیوں کی 591 نشستوں پر امیدوار میدان میں ا±ترے تھے، قومی اسمبلی کے امیدواروں کی مجموعی تعداد 5 ہزار 254 ہے، پنجاب سے قومی اسمبلی کی 141، صوبائی اسمبلی کی 296 نشستوں پر امیدواروں نے سیاسی میدان میں قسمت آزمائی کی۔سندھ سے قومی اسمبلی کی 61 اور صوبائی کی 130 نشستوں پر پولنگ ہوئی، خیبرپختونخوا سے قومی اسمبلی کی 44 اور صوبائی کی 113 نشستوں پر امیدواروں میں مقابلہ ہوا، بلوچستان سے قومی اسمبلی کی 16 اور صوبائی اسمبلی کی 51 نشستوں پر پولنگ ہوئی۔
