لاہور (وقائع نگار خصوصی)عام انتخابات کے بعد سیاسی جماعتوں میں جوڑ توڑ کا سلسلہ جاری ہے جبکہ ن لیگ ا حوالے سے کافی متحرک دکھائی دے رہی ہے،اسی حوالے سے بڑا بریک تھرو سامنے آیا ہے جہاں متحدہ قومی موومنٹ (ایم کیو ایم) پاکستان کے وفد نے جاتی امراءمیں مسلم لیگ ن کی قیادت سے ملاقات کی اور ذرائع کے مطابق ایم کیو ایم کی قیادت نے ن لیگ کی ”ہاں میں ہاں “ملاتے ہوئے مرکز میں ایک ساتھ چلنے کا عندیہ دے دیا ہے۔
”پاکستان ٹائم “کے مطابق مسلم لیگ ن اور متحدہ قومی موومنٹ کے درمیان ملاقات کی اندرونی کہانی سامنے آ گئی، ملاقات میں مل کر چلنے پر اصولی اتفاق کیا گیا ہے۔ن لیگی قائد محمد نواز شریف اور ایم کیوایم کی قیادت کے درمیان اہم سیاسی بات چیت ہوئی،پارٹی صدر شہبازشریف،مریم نواز اور دیگر لیگی رہنما بھی ملاقات میں شریک تھے۔ایم کیو ایم وفد کی قیادت ڈاکٹر خالد مقبول صدیقی نے کی،وفد میں گورنر سندھ کامران ٹیسوری،ڈاکٹر فاروق ستار، مصطفی کمال بھی شامل تھے،ملاقات میں آئندہ کی سیاسی صورتحال پر مشاورت ہوئی۔ذرائع کے مطابق مسلم لیگ ن اور ایم کیو ایم کے وفد کے درمیان ہونے والی ملاقات کے بعد مہمان وفد واپس چلا گیا جبکہ دونوں وفود کے درمیان ہونے والی ملاقات ایک گھنٹہ تک جاری رہی۔ملاقات کے دوران مسلم لیگ ن اور ایم کیو ایم نے حکومت سازی کے مشاورتی عمل کیلئے مشترکہ کمیٹی بنانے کا فیصلہ کیا ہے،دونوں جماعتوں کی نمائندہ کمیٹی دیگر پارلیمانی جماعتوں سے رابطہ کرے گی،دونوں پارٹیوں نے دیگر جماعتوں کے ساتھ رابطہ کرنے پر بھی اتفاق کیا۔اس موقع پر سندھ سے آزاد نومنتخب ارکان صوبائی اسمبلی کے حوالے سے بھی مشاورت ہوئی۔قبل ازیں رائیونڈ آمد پر مسلم لیگ ن کے قائد محمد نواز شریف،صدر شہباز شریف نے پارٹی رہنماوں کے ہمراہ ایم کیو ایم قائدین کا استقبال کیا۔
