اسلام آباد(بیورو رپورٹ)پاکستان تحریک انصاف (پی ٹی آئی) نے عام انتخابات میں دھاندلی اور سابق کمشنر راولپنڈی لیاقت علی چٹھہ کے اعترافی بیان پر جوڈیشل کمیشن بنانے کا مطالبہ کرتے ہوئے کہا ہے کہ بدقسمتی سے الیکشن کمیشن نے عوامی مینڈیٹ کے مطابق نتائج ابھی تک جاری نہیں کیے،انتخابات میں تحریکِ انصاف کو 3 کروڑ سے زائد ووٹ ملے اور ایم کیو ایم نے کراچی میں ہماری 18 سیٹیں چرائیں،مرکز اور پنجاب میں بھی پی ٹی آئی حکومت بنائے گی، پشاور کی صوبائی اسمبلی کی7 سے 8 نشستیں کمشنر نے ہروائیں،راولپنڈی کمشنر کی پریس کانفرنس ہمارے موقف کی تائید ہے،کمشنر نے اپنے ضمیر کے مطابق آواز دی،تحریک انصاف جوڈیشل کمیشن کا مطالبہ کرتی ہے،تمام لوگوں کو شامل تفتیش کیا جائے،جن جن کا نام کمشنر راولپنڈی نے لیا وہ انکوائری سے الگ ہو جائیں،تحقیقاتی رپورٹ عوام سے شیئر کی جائے۔
”پاکستان ٹائم“کے مطابق اسلام آباد میں پاکستان تحریک انصاف کے سیکرٹری جنرل عمر ایوب خان کے ہمراہ پریس کانفرنس کرتے ہوئے بیرسٹر گوہر علی خان نے کہا کہ سیکرٹری جنرل عمر ایوب کو ویلکم کرتے ہیں،وزیر اعظم کے لیے عمر ایوب ہمارے امیدوار بھی ہیں،بدقسمتی سے الیکشن کمیشن نے عوامی مینڈیٹ کے مطابق نتائج ابھی تک جاری نہیں کیے،پی ٹی آئی نے جمہوریت کو ڈی ریل ہونے سے بچانے کے لیے کوششیں کیں،بروقت انتخابات کے لیے پی ٹی آئی نے الیکشن کمیشن سے بار بار استدعا کی،قومی اسمبلی کی 180 سیٹیں ہیں جہاں ہم کامیاب ہوئے،خیبرپختونخوا سے 42، پنجاب سے 115،سندھ سے 16 اور بلوچستان سے 4 سیٹوں پر ہم کامیاب ہوئے،پنجاب میں 50 کے قریب نشستوں پر ہماری کامیابی کو ظاہر نہیں کیا گیا،سندھ کی سیٹ پر بھی ہمیں کامیابی نہیں ملی،پی ٹی آئی کو آوٹ کرنے کی کوشش کی گئی،نہ بلا رہا نہ لیڈر شپ،پی ٹی آئی کو ریلیوں اور ورکرز کنونشنز کی اجازت نہیں دی گئی،پی ٹی آئی کارکنوں کے خلاف پرچے کاٹے گئے،پھر بھی عوام نے 8 فروری کو پی ٹی آئی کو ووٹ دیا،فارم 45 پی ٹی آئی کے ساتھ ن لیگ،پیپلز پارٹی سمیت تمام پارٹیوں کو ملا،آراو کی ذمہ داری ہے فارم 45 کے تحت ڈیٹا اکٹھا کرے اور فارم 47 بنائے۔
پاکستان تحریک انصاف کے سیکرٹری جنرل عمر ایوب نے کہا کہ 12ماہ پی ٹی آئی کارکنان کے ساتھ پولیس گردی کی گئی، پی ٹی آئی کارکنوں کو دیوار سے لگایا گیا، مقدمات بنائے گئے، اب بھی مختلف کیسز میں پولیس غیرقانونی دباو ڈال رہی ہے،جو کام کیا جارہا ہے یہ کسی نگران حکمرانوں کا نہیں تھا،پی ٹی آئی مرکز اور صوبوں میں حکومت بنائے گی،مختلف لوگ کہتے تھے پی ٹی آئی کے پولنگ ایجنٹ اور امیدوار نہیں ہوں گے،ہمارے امیدوار بھی سب سے زیادہ تھے اور پولنگ ایجنٹ بھی موجود تھے،پی ٹی آئی نے انتخابات میں 180 سیٹیں جیت کر ثابت کر دیا،قومی اسمبلی میں وزارت عظمیٰ کا الیکشن لڑوں گا،ان شااللہ پی ٹی آئی مرکز اور صوبوں میں حکومت بنائے گی،یہ جیت پی ٹی آئی اور عمران خان کی ہو گی۔
پی ٹی آئی کے سیکرٹری جنرل نے کہا کہ کمشنر راولپنڈی نے ہمارے موقف کی تصدیق کی،ہمارا مطالبہ ہے کہ ہمارے 180 امیدواروں کو کامیاب قرار دے کر نوٹیفکیشن جاری کیا جائے،کراچی میں ہماری 18 سے 19 نشستیں ایم کیو ایم نے چرائی ہیں،کراچی کی سیٹوں پر پی ٹی آئی کو کامیاب قرار دیا جائے،جیلوں میں قید سینئر قیادت اور کارکنان کی بازیابی ہمارا مقصد ہو گا، 2024 میں جو انتخابی دھاندلی ہوئی اسے مدر آف آل ریگنگ ڈکلیئر کرتے ہیں،جو پارٹیاں دھاندلی کی بینفشریز ہیں وہ آپس میں گتھم گتھا ہو گئی ہیں۔انہوں نے یہ بھی کہا کہ عدم اعتماد سے متعلق مولانا فضل الرحمان نے اعتراف کیا،جی ڈی اے سمیت مختلف سیاسی پارٹیوں نے دھاندلی کے خلاف احتجاج کیا۔
