لاہور(شوبز ڈیسک)معروف گلوکار اور کئی کتابوں کے مصنف ڈاکٹر امجد پرویز انتقال کرگئے ہیں۔
”پاکستان ٹائم ”کے مطابق ڈاکٹر امجد پرویز ایک ماہ سے علیل تھے اور گردے فیل ہونے کے باعث وفات پاگئے۔ ان کی نمازجنازہ پیر کو بعد نماز ظہر جامعہ مسجد شادمان چوک لاہور میں ادا کی جائے گی۔یاد رہے ڈاکٹرامجد پرویز پیشے کے اعتبار سے انجنیئر، کئی اردو اورانگریز ی کتابوں کے مصنف و گلوکار بھی تھے,وہ آج کل ریڈیو پاکستان لاہور کے پروگرام فن اور فنکار میں ملکہ ترنم نورجہاں کے فن اور شخصیت پر اپنا تجزیہ پیش کر رہے تھے۔ڈاکٹرامجد پرویز نے میوزک کے علاوہ بہت سی کتابیں بھی لکھیں۔ وہ طویل عرصہ ایک قومی اخبار میں مستقل طورپر کالم بھی لکھتے رہے، ان کالموں کو 2006 اور 2011 میں کتابی شکل میں بھی شائع کیا گیا۔ شوبز شخصیات نے ان کے انتقال پر افسوس کا اظہار کیا۔
