لاہور(کورٹ رپورٹر)لاہور کی فیڈرل انویسٹی ایجنسی( ایف آئی اے) عدالت میں شوگر مل کے ذریعے منی لانڈرنگ کیس میں ملزمان پر فرد جرم عائد نہ ہوسکی،وزیراعظم شہباز شریف اور سابق وزیراعلیٰ پنجاب حمزہ شہباز کی بریت کی درخواست پر ایف آئی اے سے جواب طلب کرلیا گیا۔
تفصیلات کے مطابق شہباز شریف اور حمزہ شہباز کیخلاف شوگر مل کے ذریعے 25ارب روپے کی منی لانڈرنگ کیس میں حمزہ شہباز نے لاہور کے سپیشل جج سینٹرل اعجاز حسن اعوان کی عدالت میں پیش ہو کر حاضری مکمل کرائی جبکہ شہباز شریف کی حاضری معافی درخواست جمع کروائی گئی۔
ایف آئی اے کے تفتیشی افسر نے 21اکاونٹس کی رپورٹ عدالت پیش کردی۔عدالت نے10اکاونٹس کی تفصیلات فراہم نہ کرنے والے بینک افسروں کو ذاتی حیثیت میں طلب کرلیا۔عدالت نے شہباز شریف کے وکیل کی استدعا پر منجمد اکاونٹس سے کمپنی کے ملازمین کو تنخواہوں کی ادائیگی کی اجازت دے دی۔وکیل نے عدالت کے روبرو شہباز شریف اور حمزہ شہباز کی بریت کی درخواستیں دائر کیں۔وکیل نے دلائل میں کہا کہ شہباز شریف اور حمزہ شہباز کا منی لانڈرنگ سے کوئی تعلق نہیں۔شہباز شریف تمام کاروبار بچوں میں تقسیم کر چکے،انہیں سیاسی بنیادوں پر اس کیس میں ملوث کیا گیا۔عدالت نے شہباز شریف کی حاضری معافی کی درخواست منظور کرلی جبکہ ملز ملازمین کی تنخواہوں کی ادائیگی کیلئے منجمد اکاونٹ بحال کرنے کا حکم دے دیا۔عدالت نے اثاثہ جات اور اکاونٹ منجمد کرنے کی درخواست پر 10ستمبر اور بریت کی درخواست پر ایف آئی اے سے 17ستمبر کو جواب طلب کرلیا۔
اس سے قبل وزیراعظم شہبازشریف اور سابق وزیراعلیٰ پنجاب حمزہ شہباز نے شوگرمل کے ذریعے منی لانڈرنگ کیس میں بریت کی درخواستیں دائر کیں۔شہباز شریف کی جانب سے کہا گیا کہ شوگر مل منی لانڈرنگ سے کوئی تعلق نہیں، رمضان شوگر مل کا نہ تو ڈائریکٹرہوں اور نہ شیئر ہولڈر، تمام کاروبار بچوں میں تقسیم کر چکا ہوں،سیاسی بنیادوں پر اس کیس میں ملوث کیا گیا۔وزیراعظم شہباز شریف نے استدعا کی کہ عدالت کیس سے بری کرنے کا حکم دے۔درخواست میں حمزہ شہباز کا کہنا تھا کہ سال 2013 تا 2018 آفس ہولڈر نہیں رہا،کسی نےمیرے کہنے پر بینک اکاونٹس نہیں کھولے،تمام کاروبار سلمان شہباز دیکھتا تھا۔
درخواست میں استدعا کی گئی کہ کیس سے کوئی تعلق نہیں،عدالت بری کرنے کا حکم دے۔اس سے قبل 11 جون کو لاہور کی اسپیشل سینٹرل کورٹ میں 16 ارب روپے کی منی لانڈرنگ کیس کی ہونے والی سماعت میں شہباز شریف اور حمزہ شہباز سمیت دیگر 16ملزمان کی ضمانت میں 15تک توسیع کردی تھی۔
