اسلام آباد(کورٹ رپورٹر)توشہ خانہ نا اہلی ریفرنس میں پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے الیکشن کمیشن میں اپنا جواب جمع کرادیا، وکیل بیرسٹر علی ظفر نے کمیشن کے دائرہ اختیار پر اعتراض اٹھایا تو چیف الیکشن کمشنر نے الگ درخواست دائر کرنے کی ہدایت کردی۔
تفصیلات کے مطابق چیف الیکشن کمشنر سکندر سلطان راجہ کی زیر صدارت 5رکنی کمیشن نے عمران خان کیخلاف توشہ خانہ نا اہلی ریفرنس کی سماعت کی، چیئرمین پی ٹی آئی کی جانب سے الیکشن کمیشن میں جواب جمع کرا دیا گیا۔چیف الیکشن کمشنر نے کہا کہ آپ کو سماعت سے قبل جواب دینے کی ہدایت کی تھی۔
جس پر وکیل بیرسٹر علی ظفر نے التوا پر معذرت کرتے ہوئے کہا کہ سپیکر قومی اسمبلی کے ریفرنس کی بنیاد پر الیکشن کمیشن یہ معاملہ دیکھ رہا ہے، آرٹیکل 63(2) کی بنیاد پر ریفرنس دائر کیا گیا، اگر کمیشن یہ دیکھ لیتا تو شاید نوٹسز ہی نہ کرتا، عمران خان کو 62(1)ایف کے تحت نا ایل کرنے کی درخواست کی گئی۔ممبر اکرام اللہ خان نے کہا کہ سپیکر نے ایک سوال بھیجا ہے، یہ ریفرنس نہیں ہے۔
بیرسٹر علی ظفر نے دلائل میں کہا کہ الیکشن کمیشن کارروائی نہیں کرسکتا، کوئی عدالت ہی آرٹیکل 62(1) ایف کے تحت کارروائی کر سکتی ہے۔چیف الیکشن کمشنر نے کہا کہ اگر آپ الیکشن کمیشن کا دائرہ اختیار چیلنج کر رہے ہیں تو الگ درخواست دائر کریں، دوسرے فریق کو جواب کی کاپی دینے کے بعد دلائل شروع کریں،19 ستمبر کے بعد کوئی التواءکی درخواست منظور نہیں کریں گے۔بعدازاں الیکشن کمیشن نے کیس کی سماعت 19 ستمبر تک ملتوی کردی۔
