کراچی(بیورو رپورٹ)سابق وفاقی وزیر مفتاح اسماعیل کا آئینی ترامیم بارے ایسا دعویٰ کہ شہباز شریف سمیت ن لیگی قیادت بھی دنگ رہ جائے گی۔
”پاکستان ٹائم“کے مطابق کراچی میں میڈیا سے گفتگو کرتے ہوئے سابق ن لیگی رہنما مفتاح اسماعیل کا کہنا تھا کہ آئینی ترمیم آ رہی ہے اور اراکین اسمبلی کو نہیں معلوم کہ معاملہ کیا ہے؟ترامیم کے ذریعے ایک نئی عدالت لائی جا رہی ہے،ن لیگ کو سوچنا چاہیئے یہ قوانین بعد میں ان کے گلے پڑ جائیں گے۔انہوں نے کہا کہ 2 سیاسی قوتیں دست و گریبان ہیں اور خمیازہ عوام بھگت رہے ہیں،شنگھائی تعاون کانفرنس ہو رہی ہے اور ہم اسلام آباد میں تماشہ لگا کر بیٹھے ہیں،اس سے ملک کے عوام اور معیشت دونوں کا نقصان ہو رہا ہے،حکومت کو چاہیے وہ پاکستان تحریک انصاف( پی ٹی آئی )کو پر امن احتجاج کی اجازت دے جبکہ تحریک انصاف بھی تشدد کا راستہ چھوڑ کر پر امن احتجاج کرے،حکومت اور پی ٹی آئی کو ایک ایک قدم پیچھے ہٹ کر معاملے کو سنبھالنا چاہیے۔سابق وفاقی وزیر مفتاح اسماعیل نے کہا کہ ہم نے آج کراچی کے عمائدین کو جمع کیا تھا لیکن سابق وزیر اعظم شاہد خاقان عباسی اسلام آباد کے راستے بند ہونے کی وجہ سے نہیں پہنچ سکے۔
